Bu yaxınlarda Azərbaycan ilə Polşa arasında münasibətlərin yaradılmasının 30 illiyi qeyd olunub. Polşa Azərbaycanın ərazi bütövlüyünü hər zaman dəstəkləyib. Ölkələrimiz arasında əməkdaşlıq əlaqələri yüksək səviyyədə inkişaf edir. Bizim sıx dostluq əlaqələrimiz mövcuddur. Azərbaycan Həmkarlar İttifaqları Konfederasiyasının MDB Həmkarlar İttifaqının üzvü olmasında Polşa tərəfinin bizə dəstəyini yüksək qiymətləndiririk.

AZƏRTAC xəbər verir ki, bu fikirləri Azərbaycan Həmkarlar İttifaqları Konfederasiyasının sədri, Milli Məclisin deputatı, Azərbaycan-Polşa parlamentlərarası əlaqələr üzrə işçi qrupunun sədri Səttar Möhbalıyev söyləyib.

Ölkələrimiz arasında parlamentlərarası əlaqələrin də yüksələn xətlə inkişaf edəcəyinə inamını söyləyən Səttar Möhbalıyev strateji əməkdaşlıq üzrə yol xəritəsinə uyğun olaraq, əlaqələrimizin dərinləşdirilməsi üçün böyük potensial var.

Avropa Parlamentinin bu yaxınlarda qəbul etdiyi qərəzli qətnaməyə də münasibət bildirən AHİK-in sədri vurğulayıb ki, Avropa ölkəmizə qarşı yürütdüyü ikili standartlardan əl çəkməlidir. “Biz heç kimin torpağını işğal etməmişik, abidələrini, mədəni irsini məhv etməmişik, insanlarına qarşı soyqırımı həyata keçirməmişik. Əksinə, bütün bunlar Ermənistan tərəfindən Azərbaycana qarşı törədilib. Avropa ölkələrinin haqsız olduqları halda Azərbaycana qarşı qərəzli, ədalətsiz mövqeyinin, münasibətinin səbəbini anlamaq çox çətindir", - deyə o bildirib.

S.Möhbalıyev Azərbaycanın Zəfərdən sonra regionda yaratdığı reallıqdan danışaraq, ölkəmizin qonşuları ilə dostluq və sülh şəraitində yaşamağa hazır olduğunu dilə gətirib. Bildirilib ki, Ermənistan həmişə olduğu kimi, yenə də xoş olmayan siyasət yürüdür və üçtərəfli Bəyanatın müddəalarına əməl etmək istəmir. Zəngəzur dəhlizinin yaradılmasına imkan verməyən bu ölkə hələ də nə istədiyini bilmir.