Azərbaycan ilə Qazaxıstan arasında əlaqələr bütün sahələrdə inkişaf etməkdə və dərinləşməkdə davam edir. Qazaxıstan dövləti həmişə Azərbaycanın ərazi bütövlüyünü dəstəkləyib.

AZƏRTAC xəbər verir ki, bu fikirləri Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev aprelin 18-də AHİK-də Qazaxıstan Elm və Təhsil İşçiləri Həmkarlar İttifaqının sədri Aygül Mukaşeva ilə keçirilən görüşdə söyləyib.

AHİK-in sədri bildirib ki, ölkələrimiz türkdilli və digər beynəlxalq təşkilatlarda eyni mövqedən çıxış edirlər.

44 günlük Vətən müharibəsindən sonra Azərbaycanın yeni inkişaf və quruculuq mərhələsinə qədəm qoyduğunu diqqətə çatdıran S.Möhbalıyev ölkəmizdə bütün sahələrdə əldə olunan nailiyyətlərdən danışıb. AHİK sədri ölkələrimiz arasında həmkarlar ittifaqları arasında əlaqələrin genişləndirilməsinin vacibliyini vurğulayıb.