Oktyabrın 3-də Heydər Əliyev Mərkəzində Şərq ölkələrinin filmlərinin dünyaya tanıdılması üçün vacib platforma rolunu oynayacaq “Omarket”in (Şərq ölkələrinin kino marketi) açılış mərasimi keçirilib.

AZƏRTAC xəbər verir ki, “Omarket”in açılışı Mədəniyyət Nazirliyi və Kino Agentliyinin dəstəyi ilə ölkəmizdə ilk dəfə keçirilən “Baku Cinema Breeze” adlı böyük film festivalı çərçivəsində reallaşıb. Audiovizual sənayenin inkişafına istiqamətlənən bu tədbir Mədəniyyət Nazirliyinin “Yaradıcı Azərbaycan” layihəsi çərçivəsində həyata keçirilir. “Baku Cinema Breeze” indiyə qədər ayrı-ayrılıqda təşkil olunan bir sıra tanınmış festivalları bir araya gətirərək dünya kinematoqrafiyasının şedevrlərini nümayiş etdirmək üçün vahid şəbəkə rolunu oynayacaq.

Əvvəlcə qonaqlar yaradıcı sənaye nümayəndələrinin fəaliyyətinin tanıdılması məqsədilə təşkil edilən sərgi ilə tanış olublar. Sərgi kino, animasiya, musiqi, mədəniyyət sahəsində startaplar, oyun texnologiyaları, dəb, dizayn kimi yaradıcı klasterləri, eləcə də yaradıcı məkanları bir araya gətirib.

Tədbirdə mədəniyyət nazirinin müavini Səadət Yusifova bildirib ki, ilk dəfə keçirilən “Baku Cinema Breeze” ölkəmizdə fəaliyyət göstərən bütün kino festivallarını özündə birləşdirir, bütün kino ekosistemini bir çətir altında toplayır. Layihə çərçivəsində “Omarket” sərgisinin təşkil edilməsi ölkəmizdə kino sənayesinin inkişafı üçün böyük potensialın olduğunu və dövlətimizin bu prosesə dəstək verdiyini göstərir.

Onun sözlərinə görə, ümumilikdə “Baku Cinema Breeze” platforması 15-dən çox ölkənin nümayəndələrinin, 100-dən çox qonağın iştirak edəcəyi, müxtəlif ölkələrdən 300-ə yaxın filmin nümayiş ediləcəyi tədbirləri özündə birləşdirəcək. Platforma çərçivəsində keçirilən festivallar təkcə kino sənətinin inkişafına təkan vermir, həm də gənc və istedadlı rejissorlarımıza özlərini ifadə etmək, dünyaya çıxış əldə etmək imkanı yaradır. Festivallarda nümayiş olunacaq filmlərin hər biri böyük zəhmət, yaradıcılıq və sevgi ilə ərsəyə gəlib.

“Bu gün Azərbaycan kinosu yalnız öz daxili auditoriyası üçün deyil, həm də beynəlxalq kino bazarı üçün əhəmiyyətli oyunçuya çevrilir. Sahənin inkişafının, rəqabətqabiliyyətliliyinin və gəlirliliyin artırılması üçün əlavə vergi güzəştləri, investisiyaların cəlb olunması kimi təşviq mexanizmlərinə ehtiyac duyulur.

“Omarket” Şərq ölkələrinin filmlərinin dünyaya tanıdılması üçün vacib bir platformadır. Azərbaycan olaraq, biz bu bazarda öz milli filmlərimizi təqdim etməklə regionumuzun film sektorunu inkişaf etdirmək və onu qlobal kino sənayesinə inteqrasiya etmək niyyətindəyik. Bu bazar, eyni zamanda, regionun istedadlı rejissor və prodüserlərinin qlobal bazara çıxışını təmin edəcək və beynəlxalq əməkdaşlıqların qurulmasına şərait yaradacaq”, - deyə nazir müavini bildirib.

Tədbirdə Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədovun çıxış edərək bildirib ki, film sənayesinin səmərəli şəkildə idarə edilməsi maliyyə, yaradıcı proseslər və insan resurslarının optimal şəkildə təşkil olunmasına bağlıdır. Bu proses bir çox mərhələni və iştirakçını əhatə edir, çünki film istehsalı həm yüksək riskli, həm də yüksək gəlirli bir sahədir. Səmərəli idarəetmə həm filmin keyfiyyətini artırır, həm də onun maliyyə uğurunu təmin edir.

Onun sözlərinə görə, özəl sektorla yanaşı, bir çox ölkələrdə film istehsalını təşviq etmək üçün Dövlət proqramları və qrantlar təqdim edilir. Azərbaycan və bir çox Avropa ölkələrində dövlət qurumları milli filmlərin maliyyələşdirilməsində mühüm rol oynayır. Bu qrantlar yerli kino sənayesinin inkişafını dəstəkləyir və bədii filmlərin çəkilişini maliyyələşdirir.

Tədbirin film şirkətləri ilə investorları əlaqələndirmək üçün əhəmiyyətini xüsusi qeyd edən Orxan Məmmədov deyib ki, bu əlaqələndirmə prosesi həm studiyalara, həm müstəqil prodüserlərə, həm də investorların öz maraqlarını qorumağa yönəlik mexanizmlərdən biridir: “Bununla yanaşı, investorların məlumatlandırılması, sahibkarların maarifləndirilməsi və digər dəstək tədbirlərinın həyata keçirilməsi çox önəmli məsələlərdəndir. Film sənayesinin səmərəli şəkildə idarə edilməsi və inkişafı üçün KOBİA tərəfindən də sahibkarlıq subyektləri üçün müxtəlif maarifləndirici görüş, seminar və digər bu kimi tədbirlər təşkil edilə bilər”.

Sonra “Omarket - sənaye lokomotivi, festivallar, yayım platforması, birgə istehsal” mövzusunda birinci panel iclası keçirilib.

ABŞ televiziya sənədləri və elmləri akademiyasının üzvü Kamran Qasımovun moderatorluğu ilə keçirilən panel müzakirədə Qırğızıstan Mədəniyyət Nazirliyinin Kino sənayesi şöbəsinin əməkdaşı Maratbek Asanaliyev, Türkiyənin “Kunay” film şirkətinin rəhbəri Leyla Atakişiyeva, Gürcüstanın Kino Mərkəzinin əməkdaşı Georgi Tskhvediani, Azərbaycandan Zaur Darabzadə və Rusiyadan rəqəmsal media eksperti Nina Laricheva öz fikirlərini bölüşüblər.

Günün ikinci yarısında festival “Omarket - film komissarı üçün yeni istiqamətlər” mövzusunda panel müzakirələrlə davam edib.