Bakı Dövlət Universitetinin (BDU) Əmək və ekologiya hüququ kafedrasının professoru Mayis Əliyevin təşkilatçılığı və rəhbərliyi ilə “Səhnələşdirilmiş parlament debatı” adlı simulyasiya keçirilib.

AZƏRATC xəbər verir ki, debatda Bakı Dövlət Universitetinin “SABAH” qruplarının və Hüquq fakültəsinin III kurs tələbələri iştirak ediblər. Rol oyunları metodundan istifadə etməklə təşkil olunmuş debatda tələbələr “Sosial təhlükəsizlik haqqında” Azərbaycan Respublikası Qanununun layihəsini müzakirə ediblər.

Debatda rol oyunları metodunun hüquqi təhsil prosesində tətbiqinin əhəmiyyəti geniş şəkildə müzakirə olunub, bununla bağlı tədbir iştirakçılarının və deputatların fikirləri dinlənilib.

Professor Mayis Əliyev bildirib ki, tədbirin məqsədi tələbələrdə parlament debatı aparmaq mədəniyyətinin, həmçinin hüquq düşüncəsi və mədəniyyətinin, normativ hüquqi aktlara müstəqil münasibət bildirmək, mühakimə irəli sürmək və təhlillər aparmaq bacarıqlarının formalaşdırılması, natiqlik bacarıqlarının inkişaf etdirilməsi, eləcə də tələbələrin normal yaradıcılıq prosesinə fəal surətdə cəlb edilməsidir. Tələbələr bu debata çox böyük həvəslə hazırlaşıblar.

“Əslində bu debata 4 ay ərzində hazırlıq aparılıb. Çünki iki ay yalnız qanun layihəsinin hazırlanmasına sərf edilib, iki ay isə onun müzakirəsi ilə bağlı məruzələr hazırlanıb. Bu, təlimdə yeni innovativ metodların tətbiq edilməsini özündə əks etdirir. Biz artıq ənənəvi təhsil sistemindən daha interaktiv təhsil sisteminə keçməyə, təlimin daim yeni metodlarla təşkilinə üstünlük veririk. Hüquq fakültələri təkcə hüquqşünas mütəxəssislər yox, eyni zamanda, siyasi liderlər, ictimai xadimlər də yetişdirdikləri üçün interaktiv metodlardan istifadə etməklə tələbələrdə parlament mədəniyyətinin formalaşdırılmasını istəyirik”,- deyə M.Əliyev vurğulayıb.

Sonda müvafiq rolları canlandıran və tədbirin təşkilində yaxından iştirak edən tələbələrə təşəkkürnamə verilib.

Tədbirdə BDU-nun elmi-pedaqoji heyəti, Hüquq fakültəsinin və “SABAH” Mərkəzinin rəhbərliyi, o cümlədən Milli Məclisin deputatları, hüquqşünas-vəkillər, ADA Universitetinin, Polis Akademiyasının və Milli Aviasiya Akademiyasının hüquq fakültələrinin rəhbərləri və tələbələri iştirak ediblər