Sentyabrın 28-də İkinci Fəxri xiyabanda Vətən müharibəsinin 9 şəhidinin – polkovnik-leytenant Sədi Musayev, Vətən Müharibəsi Qəhrəmanı, kapitan Ceyhun Həsənov, kapitanlar Şahmar Quliyev, Həmidağa Hüseynzadə, baş leytenant Kamil Rəhimli, leytenantlar İmran Əliyev, Elvin Şükürlü, əsgərlər Cəbrayıl Dövlətzadə və Nurlan Ağakişiyevin anım mərasimi keçirilib.

AZƏRTAC xəbər verir ki, əvvəlcə şəhidlərin xatirəsi bir dəqiqəlik sükutla yad edilib. Sonra Azərbaycan Respublikasının Dövlət Himni səsləndirilib.

Şəhidlərin ruhuna dualar oxunub, onların əziz xatirəsi ehtiramla yad edilib.

Tədbirdə çıxış edən Abşeron Rayon İcra Hakimiyyətinin başçısı İradə Gülməmmədova bildirib ki, 44 günlük Vətən müharibəsi müasir gəncliyin vətənpərvərliyinin, qorxmazlığının bariz nümunəsidir. Bir il əvvəl sentyabrın 27-dən başlayaraq həm ağrılı, həm də qürurlu günlər yaşadıq. Şəhidlərimiz ermənilərin illərdir xalqımıza qarşı törətdiyi amansız faciələrin, torpaqlarımızda etdikləri vəhşiliklərin qisasını aldılar. Qanları, canları ilə Azərbaycan bayrağını əzəli və əbədi torpaqlarımızda yüksəltdilər. O torpaqların hər qarışında şəhidlərimizin qanı var. Bu günlər ağrılı olduğu qədər də fərəhlidir. Tarix yazan qəhrəmanlarımızın sayəsində başımızı dik tuturuq. Sentyabrın 27-də Prezident İlham Əliyev və birinci xanım Mehriban Əliyevanın şəhidlərin portretlərini tutaraq yürüşün önündə getmələri dünyaya bir mesaj idi. Bu, o deməkdir ki, Vətən yolunda canını-qanını verənlər hər birimiz üçün dəyərlidir, onların xatirəsi bütün dünya azərbaycanlıları üçün əzizdir. Şəhidlərimizlə, qazilərimizlə, gənc övladını Vətən yolunda qurban verən məğrur şəhid valideynləri ilə qürur duyuruq.

Milli Məclisin deputatı Elman Nəsirov çıxış edərək deyib ki, bir il əvvəl hər kəs erməni faşizminin əsl simasına şahidlik etdi. Ermənistan silahlı qüvvələrinin təxribatına qarşı Azərbaycan Ordusu cəbhəboyu əks-hücum əməliyyatına başladı. Qırx dörd günlük müharibə zamanı Azərbaycanın hərbi qulluqçuları əsl vətənpərvərlik, qəhrəmanlıq nümunələri göstərdilər: “Şəhidlik ən uca zirvədir. O məqama hər kəs ucala bilmir. Şəhadətə qovuşmaq da cəsarət tələb edir. İnsan var adından, var-dövlətindən keçə bilir. Lakin hamı dünyada ən şirin nemət olan canından keçə bilmir. Şəhid valideynlərinin acısını anlayıram. Elə mərd, qorxmaz övladı itirmək, əlbəttə ki, çox ağrılıdır. Lakin şəhidlərimizin əzizləri, doğmaları bilsinlər ki, şəhid olan hər bir hərbi qulluqçumuzun qisası dəfələrlə alınıb. Sentyabrın 27-də dövlətimizin başçısı xalqa müraciətində bildirdi ki, əgər Ermənistan silahlı qüvvələri ərazi bütövlüyümüzə, hərbçilərimizin, dinc sakinlərimizin həyatına təhlükə törədəcək hər hansı bir hərəkətə yol versələr, yerindəcə məhv ediləcəklər. Bu, bizim qəti mövqeyimizdir. Düşmən həmin düşməndir. Onların xislətini dəyişəcəyi inandırıcı deyil. Ona görə də yetişən nəsil Vətən fədailərindən örnək almalıdırlar. Sevindirici haldır ki, bu gün azyaşlı uşaqlar böyüyəndə qəhrəmanlarımız kimi hərbçi olmaq arzularını ilk fürsətdə ifadə edirlər. Bu, çox müsbət haldır. Hamımız şəhidlərimizlə qürur duyuruq. Belə oğulları olan Vətən basılmaz. Şəhid ailələrinin kədərləri böyükdür. Lakin şəhidlər ölmürlər, onlar cənnətin ən gözəl guşələrindədirlər. Şəhidin ruhu o zaman narahat olur ki, torpaq işğal altında qalır. Ancaq bizim şəhidlərimizin hamısının ruhu şaddır. Çünki o torpaqların əsl sahibləri doğma yurdlarına geri qayıdırlar”.

Milli Məclisin deputatı şəhid ailələrinə, müharibə əlillərinə, qazilərə göstərilən dövlət qayğısından bəhs edib, onların mənzil və avtomobillərlə təminatı məsələlərinə diqqət çəkib. O, dövlət başçısının şəhid ailələri, müharibə əlilləri və qazilərin problemlərinin diqqətdə saxlanılması ilə bağlı xüsusi tapşırıq verdiyini qeyd edib.

Xətai Rayon İcra Hakimiyyətinin başçısı Rafiq Quluyev xalqımızın ötən il 44 gün ərzində ancaq qələbə sevinci yaşadığın, şəhidlərimizin qanı, qazilərimizin sağlamlıqları hesabına torpaqlarımızın azad olunduğunu bildirib. O, Prezident İlham Əliyevin rəhbərliyi altında ölkəmizdə ordu quruculuğu istiqamətində həyata keçirilən uğurlu islahatları, peşəkar zabitlərin yetişdirilməsini, hərbçilərin döyüş təcrübəsinin artırılmasını Qələbəni şərtləndirən başlıca amillər kimi qeyd edib. R.Quluyev zabit və əsgərlərimizin döyüş meydanlarında böyük hünər və rəşadət göstərərək, adlarını xalqımızın qəhrəmanlıq tarixinə qızıl hərflərlə yazdırdıqlarını vurğulayıb.

Yeni Azərbaycan Partiyasının Xətai rayon təşkilatının sədri Vüqar Rəhimzadə şərəfli missiyanı uğurla yerinə yetirən qəhrəman Azərbaycan oğullarının uyuduqları məkanları daim ziyarət etməyin hər kəsin borcu olduğunu diqqətə çatdırıb: “Onların şücaəti, düşməni lərzəyə gətirən qorxmazlığı, ölümün üzərinə cəsarətlə addımlamaları gənclər üçün örnək olmalıdır. Şəhidlərimiz, qazilərimiz xalqımızın əzmkar, döyüşkən və qorxmaz olduğunu bir daha dünyaya nümayiş etdirdilər. Şəhidlərimizin əziz xatirəsini daim ehtiramla yad edəcək, qəhrəmanlıqlarını nəsillərdən-nəsillərə ötürəcəyik. Belə övlad yetişdirdikləri üçün şəhid valideynlərinin qarşısında baş əyirəm”.

Birinci Qarabağ müharibəsinin iştirakçısı, hərbi ekspert, polkovnik Şair Ramaldanov bildirib ki, Qarabağı görməyən, o cümlədən öz doğma torpaqlarından qundaqda çıxan gənclər Müzəffər Ali Baş Komandanın çağırışına səs verərək cəbhə bölgəsinə axın etdilər: “Birinci Qarabağ müharibəsi döyüşçülərinin, şəhidlərinin davamçıları həm atalarının, doğmalarının qisasını aldılar, həm də onların yarımçıq qalan mübarizələrini uğurla tamamladılar. Xalqımız qədirbilən xalqdır. Sentyabrın 27-də bütün dünya şahid oldu ki, Azərbaycan xalqı öz şəhidlərini necə ehtiramla, hörmətlə yad edir. Şəhidlərimizin uyuduğu məkanlar hər bir azərbaycanlı üçün ziyarətgaha çevrilib. Sentyabrın 27-də ən yaddaqalan məqamlardan biri də Prezident İlham Əliyevin şəhid portreti ilə Ali Baş Komandan kimi Anım Günü ilə bağlı keçirilən yürüşə rəhbərlik etməsi idi. Azərbaycan xalqı daim Vətən uğrunda canından, qanından, sağlamlığından keçən bütün şəhid və qazilərə minnətdar olacaq”.

Şəhid leytenant Elvin Şükürlünün qardaşı, baş leytenant Elnur Şükürlü, şəhid polkovnik-leytenant Sədi Musayevin həyat yoldaşı Gülşən Musayeva Vətən uğrunda canını qurban verən doğmaları ilə fəxr etdiklərini, Azərbaycan Ordusunun şəhidlərimizin qanını yerdə qoymadıqlarını bildiriblər.

Şəhidlərin ailə üzvləri çıxışlarını “Torpaq su ilə qarışanda palçıq, qanla qarışanda Vətən olur” sözləri ilə yekun vurublar.