Avqustun 6-sı Vətən müharibəsi şahidi Məhəmməd Vaqif oğlu Şəbiyevin doğum günüdür.

AZƏRTAC xəbər verir ki, Məhəmməd Şəbiyevin böyüyüb boya-başa çatdığı 2-ci Zabrat qəsəbəsində inşa edilən xatirə bulağının şəhidin doğum günü münasibətilə açılışı olub.

Açılış mərasimində şəhidin ailə üzvləri, döyüş yoldaşları, rayon rəsmiləri, qəsəbə sakinləri, müharibə veteranları iştirak ediblər.

Mərasim iştirakçıları əvvəlcə şəhidin məzarını ziyarət edib, üzərinə güllər düzüb, Azərbaycanın müstəqilliyi və ərazi bütövlüyü uğrunda canından keçən qəhrəman Vətən övladlarının xatirəsini bir dəqiqəlik sükutla yad ediblər. Sonra Azərbaycan Respublikasının Dövlət Himni səsləndirilib.

Mərasimdə şəhid Məhəmməd Şəbiyevin qısa, lakin şərəfli ömür yolu barədə məlumat verilib. Bildirilib ki, 1998-ci ildə anadan olan Məhəmməd Şəbiyev vətənpərvər ruhda böyüyüb və uşaqlıqdan hərb sahəsinə maraq göstərib. O, Vətənə xidmət etmək arzusu ilə 2013-cü ildə Cəmşid Naxçıvanski adına Hərbi Liseyə qəbul olub. Hərbi Liseyi bitirdikdən sonra 2016-cı ildə Heydər Əliyev adına Azərbaycan Ali Hərbi Məktəbinə daxil olub. 2020-ci ildə leytenant rütbəsində hərbi xidmətə yollanan Məhəmmədin ən böyük arzusu düşmən tapdağında olan torpaqlarımızı işğaldan azad etmək idi.

Məhəmməd Vətən müharibəsinin ilk günündən döyüşlərə qoşulub. Qəhrəman leytenant Ağdam rayonunun müdafiəsində, Talış zirvəsinin və Suqovuşanın azad edilməsində iştirak edib. Oktyabrın 4-də Suqovuşanın azad edilməsi uğrunda gedən şiddətli döyüşlərdə şəhidlik zirvəsinə ucalıb. Cəsur zabit İkinci Fəxri xiyabanda dəfn edilib.

Şəhidin nişanlısı Zinyət Pənahova Məhəmmədlə bağlı xatirələrini bölüşərək deyib: “Məhəmmədlə sonuncu telefon söhbətimiz oktyabrın 4-də olub. Dedi, indi danışa bilmirəm. Sən demə, şiddətli döyüşlər gedirmiş. Həmin gün saat 15:30 radələrində şəhidlik zirvəsinə ucalıb. Onun mənə keçən il bağışladığı saat 15:30-da dayandı”.

Məhəmməd Şəbiyev ailənin yeganə oğul övladı idi. Şəhidin atası Vaqif Şəbiyev Birinci Qarabağ müharibəsinin iştirakçısıdır.

“Mənim balam çox vətənpərvər olub. Həmişə deyirdi ki, mən atamın yarımçıq qoyduğu işi tamamlayacağam, torpaqlarımızı azad edəcəyəm. Verdiyi sözü qanı, canı bahasına yerinə yetirdi. Mən balamla fəxr edirəm. Allah bütün şəhidlərimizə rəhmət eləsin”, - deyə şəhidin nənəsi Mehriban Şəbiyeva bildirib.

Qeyd edək ki, Məhəmməd Şəbiyev müdafiə nazirinin əmri ilə “Azərbaycan Ordusunun 100 illiyi” medalı ilə təltif olunub. Döyüşlərdə göstərdiyi rəşadət və qəhrəmanlığa görə Məhəmməd Şəbiyev ölümündən sonra “Suqovuşanın azad olunmasına görə” və “Cəsur döyüşçü” medalları ilə təltif edilib.