Prezident İlham Əliyevin rəhbərliyi ilə Azərbaycan Ordusu 29 illik həsrətdən sonra Zəngilanı azad etdi. Zəngilanın azadlığı uğrunda canından keçən şəhidlərə Allahdan rəhmət diləyirik, qazilərə can sağlığı arzu edirik. Bu gün doğma yurdumuza qayıtdığımız üçün dövlətimizin başçısına təşəkkür edirik.

AZƏRTAC xəbər verir ki, bu fikirləri jurnalistlərə müsahibəsində Ağalıya köçən kənd sakini Şamil Hacıyev söyləyib.

O qeyd edib ki, sevinclərinin həddi-hüdudu yoxdur, eyni zamanda, bu gün çox qürurludurlar. Çünki uzun illərdir gözlədikləri an yetişib.

“Biz 29 ildir Zəngilandan uzaqda olsaq da, ürəyimiz daim doğma yurdumuz ilə döyünüb. İnanırdıq ki, yaxın zamanda o gün gələcək. Bu, belə də oldu. Zəngilana qayıtdığımız üçün özümüzü xoşbəxt hiss edirik”,- deyə Ş.Hacıyev bildirib.