Maqsud İbrahimbəyov Yaradıcılıq Mərkəzində ”Səidə Sübhi. Şairin portreti” sənədli filminin premyerası keçirilib. Azərbaycan Kinematoqrafçılar İttifaqının dəstəyi ilə ərsəyə gələn filmin rejissoru Oleq Namazovdur.

AZƏRTAC xəbər verir ki, premyerada mədəniyyət və incəsənət xadimləri, ziyalıları, media nümayəndələri iştirak ediblər.

Azərbaycan Yazıçılar Birliyinin üzvü Səidə Sübhi “Somnambula” poeziya toplusunun müəllifi, bir çox respublika və beynəlxalq şeir müsabiqələrinin laureatıdır.

Şair AZƏRTAC -ın müxbirinə çəkilişlərdəki təəssüratını bölüşüb.

“Filmin qəhrəmanı olmaq heyrətamiz idi. Mənim üçün bu, yeni maraqlı təcrübə idi. Oleq Namazovun həm bir insan, həm də rejissor kimi nəzakətliyini qeyd etmək istəyirəm. Aramızda çox ahəngdar əməkdaşlıq alındı. Şəxsən mənim üçün bu, bir növ özümlə kənardan tanış olmaq idi”, - deyə Səidə Sübhi qeyd edib.

Kinorejissor Oleq Namazov AZƏRTAC -ın müxbirinə layihə üzərində işlərin necə aparıldığı barədə bəhs edib.

“Belə bir filmin çəkilməsi ideyası mənə 2023-cü ildə, mədəniyyət mərkəzlərinin birində bard mahnılarının ifaçıları arasında Səidə Sübhini görəndən sonra gəldi. Səidə bu fikri maraqlı hesab etdi. Daha sonra Azərbaycan Kinematoqrafçılar İttifaqına təklif olundu, ideya orada təsdiqləndi. Çəkilişlər 2024-cü ilin yazında başladı. Nəhayət, 2025-ci ilin fevralında film həm Azərbaycan Kinematoqrafçılar İttifaqı, həm də qəhrəman tərəfindən bəyənildi. Anna İbrahimbəyova bizə filmin nümayişini Maqsud İbrahimbəyov Yaradıcılıq Mərkəzində keçirmək imkanını lütfkarlıqla təqdim etdi. Buna görə ona ayrıca minnətdarlığımı bildirirəm”, - deyə rejissor vurğulayıb.