Təxminən ötən bir il ərzində biz koronavirus infeksiyasının ölkə ərazisində yayılmasının müxtəlif mərhələlərinə şahidlik etmişik. Bu müddət ərzində yoluxmaların sayında kəskin artım olur, görülən tədbirlər nəticəsində azalma müşahidə olunur və müxtəlif yumşalmalar həyata keçirilir.

AZƏRTAC xəbər verir ki, bu barədə Prezidentin köməkçisi – Prezident Administrasiyasının iqtisadi məsələlər və innovativ inkişaf siyasəti şöbəsinin müdiri Şahmar Mövsümov Nazirlər Kabineti yanından Operativ Qərargahın dekabrın 8-də keçirilən brifinqində deyib.

Şahmar Mövsümov qeyd edib ki, ötən müddət ərzində səhiyyə sisteminin imkanlarının daha da yaxşılaşdırılması ilə bağlı bir çox işlər görülüb. Modul tipli yeni xəstəxanaların istifadəyə verilməsi, səhiyyə strukturlarının təchizatının daha da yaxşılaşdırılması, xarici ölkələrdən həkimlərin dəvət olunması, treninqlərin keçirilməsi bu istiqamətdə atılan mühüm addımlar hesab olunur. Biz iyul-avqust aylarında sərtləşdirilmiş karantin rejiminə keçərkən yoluxmaların sayı 500 civarında idi. Bu gün isə səhiyyə sistemimiz gündəlik 4000 yoluxma sayına dözə bilir. Lakin heç bir səhiyyə sistemi limitsiz deyil.

Xəstəxanalarla daim təmasda olduğunu söyləyən Prezidentin köməkçisi qeyd edib ki, bu gün həkimlərimiz çox gərgin bir şəraitdə fəaliyyətlərini davam etdirirlər. “Gərək biz hər birimiz bu cəbhədə onlara yardım edək. Vətən müharibəsi zamanı biz birlikdə düşmənə qarşı mübarizə aparırdıqsa, bu gün də həmin birliyə ehtiyac var”, - deyə Şahmar Mövsümov əlavə edib.