Azərbaycan gəncliyi vətənpərvərlik ruhunda, mənəvi dəyərlərimizə bağlı ruhda tərbiyə olunmalıdır. Cəmiyyətimiz gənclərə hər zaman inanır.

Bunu AZƏRTAC-a açıqlamasında 2 Fevral – Azərbaycan Gəncləri Günü ilə bağlı keçirilən bayram tədbirində "Mənəvi Dünya” Milli-Mənəvi Dəyərlərimizin Təbliği İctimai Birliyinin sədri hacı Şahin Həsənli deyib.

O qeyd edib ki, Azərbaycanda uğurlu dövlət-gənclər siyasəti həyata keçirilir. Fevralın 2-nin Gənclər Günü elan olunması da ölkəmizdə gənclərə göstərilən diqqət və qayğının göstəricisidir. Gənclik hər bir xalqın gələcəyidir.

“Azərbaycan gəncliyi tarixin sınağından üzüağ çıxıb, xüsusilə Vətən müharibəsində. Biz Azərbaycan gəncliyinin döyüş meydanında böyük şücaət göstərməsinin şahidi olduq. Azərbaycan gəncliyi öz vətənpərvərliyinin mənəvi, milli dəyərlərimizə bağlı olduğunu sübut etdi.

Prezident İlham Əliyev Şuşada çıxışı zamanı bir məqama xüsusi diqqət yetirdi. Qeyd etdi ki, biz milli və dini dəyərlərimizə bağlı olmasaydıq, qələbə əldə edə bilməzdik. Həqiqətən də bu qalibiyyətdə ordumuzun hərbi hazırlığı, peşəkarlığı ilə yanaşı, gənclərimizin milli dəyərlərimizə bağlı olmaları da həlledici rol oynadı”, - deyə o əlavə edib.