Azərbaycan Voleybol Federasiyasının prezidenti Şahin Bağırov qadın voleybolçulardan ibarət yığmanın yeni baş məşqçisi Faiq Qarayevin müqaviləsinin müddətini açıqlayıb.

AZƏRTAC xəbər verir ki, o, bu barədə Faiq Qarayevin təyinatı ilə bağlı keçirilən mətbuat konfransında məlumat verib.

Bildirib ki, Faiq Qarayev İdarə Heyətində aparılan müzakirələr nəticəsində seçilib: " O, ən azı 2026-cı ilə qədər yığmanın baş məşqçisi olacaq. Biz F. Qarayevin təcrübəsinə bələdik və ona inanırıq. Çünki o, bu işin içində olan bir şəxsdir".

Qeyd edək ki, yığmada sonuncu dəfə bu vəzifəni türkiyəli Ataman Güneyligil icra edib. Avropa çempionatında uğursuz çıxış səbəbindən onunla müqaviləsinin müddəti artırılmayıb.