Azərbaycanda idmanın inkişafı ümummilli lider Heydər Əliyevin adı ilə bağlıdır. Ümummilli Liderin idman siyasətini uğurla davam etdirən Prezident İlham Əliyevin diqqət və qayğısı nəticəsində son 15 ildə idmançılarımız beynəlxalq yarışlarda yüksək nailiyyətlər əldə ediblər. Azərbaycanda boksun böyük ənənələri var. Ölkəmizdə idmanın bu növünün kütləviliyinin daha da artırılmasına çalışmalıyıq.

AZƏRTAC xəbər verir ki, bu sözləri Azərbaycan Boks Federasiyasının yeni prezidenti Sahil Babayev fevralın 9-da təşkil olunan mətbuat konfransında deyib.

Azərbaycan Boks Federasiyanın əvvəlki rəhbərliyinin idmanın bu növünün inkişafı istiqamətində kifayət qədər böyük işlər gördüyünü vurğulayan S.Babayev bildirib ki, boksçularımız hər zaman böyük nailiyyətlər qazanıblar.

Azərbaycan komandasının Olimpiadalarda qazandığı medalların sayına görə boksçularımızın ikinci yerdə olduğunu vurğulayan S.Babayev qeyd edib: “İdmançılar, məşqçilər və federasiyanın əməkdaşları ilə birgə boksun daha da inkişaf etdirilməsi üçün əlimizdən gələni edəcəyik. Boksun kütləviliyinin uşaqlar və yeniyetmələr arasında da təmin edilməsi üçün bir sıra işlər görülməlidir. İstedadlı idmançıları peşəkar şəkildə hazırlıqlara cəlb etmək, onların yarışlarda daha fəal iştirakını təmin etmək üçün mühüm tədbirlər həyata keçiriləcək”.