×
Ötən ilin payızında Azərbaycanın Birinci vitse-prezidenti Mehriban Əliyevanın təşəbbüsü ilə istifadəyə verilən DOST İnklüziv İnkişaf və yaradıcılıq Mərkəzində həm əlillər, həm həssas kateqoriyadan olanlar müxtəlif istiqamətlər üzrə tədris alır, sosial adaptasiyadan keçir və tam şəkildə cəmiyyətə inteqrasiya olurlar. Mərkəzin növbəti könüllük forumuna ev sahibliyi etməsinin rəmzi mənası da var.
AZƏRTAC xəbər verir ki, bu sözləri əmək və əhalinin sosial müdafiəsi naziri Sahil Babayev DOST Agentliyinin “Könüllü DOST” proqramının 3 illiyinə həsr olunmuş “Sosial sahədə könüllülük” forumunda deyib.
Nazir çıxışına davam edərək bildirib: “Könüllülük proqramı Azərbaycanda böyük bir hərəkata çevrilib və həmin hərəkatdan biz də bəhrələnirik. İlk mərkəz açılandan artıq üç il vaxt keçib və bundan əvvəl DOST konsepsiyası yaradılıb. ASAN xidmətin böyük təcrübəsindən yararlanaraq onlarla bu sahədə geniş əməkdaşlıq qurduq, beynəlxalq təcrübəyə müraciət etdik və könüllülük proqramını yaratdıq. Könüllülük proqramı üç il ərzində böyük yol keçib, müxtəlif altproqramları yaranıb, “Gənc DOST”, “Gümüşü DOST”, “Korporativ DOST və “Distant DOST” kimi dörd altproqram həyata keçirilib və bu gün daha bir altproqram elan ediləcək.
Könüllülər üç il ərzində böyük bir orduya çevrilib və cəmiyyətə yeni bir istiqaməti, yeni bir seqmenti aşılayır, sosial xidmət, inklüzivlik, hər kəsə bərabər şansların tanınması sahəsində iş görür. Böyük nəticələrimiz var. Artıq 200 könüllü mərkəzlərdə daimi işə düzəlib. Nəzərə alaq ki, hələ 5 mərkəz fəaliyyət göstərir və onların sayı artdıqca könüllülərin də sayı artacaq. Könüllülərin pandemiya dövründə böyük rolu olub. Xüsusilə yaşlıların, ahıl və tənha yaşayan şəxslərin qorunması, onların evlərini tərk etməməsi üçün könüllülər ölkəboyu onlara müxtəlif çatdırılma xidmətləri göstəriblər, ən zəruri ehtiyaclarını qarşılayıblar, onlara lazım olan ərzaq və dərmanları ünvanlara çatdırıblar”.
Forumdakı çıxışını nazir belə yekunlaşdırıb: “Bu, hələ başlanğıcdır. Vaxt gələcək ki, bugünkü 60 min könüllü 200 min, aktiv iştirakçı 20 min, işə götürülən 2 min nəfər olacaq və bu rəqəmlər arta-arta gedəcək. İnanırıq ki, könüllülər cəmiyyətə, gənclərə, yaşlılara həm sosial xidmət, həm də bu sahədə inklüzivliyi, məşğulluğu, əlilliyi və bütün digər sahələri aşılayacaqdır, çünki biz həqiqətən də birlikdə güclüyük. Hansısa bir fərdin, hansısa bir kateqoriyanın dövlət dəstəyindən kənarda qalması cəmiyyəti gücləndirə bilməz. Cəmiyyət inklüzivliyi ilə hər kəsə bərabər imkanların tanınması ilə güclüdür. Könüllülük üçün 60 min müraciətin olması özlüyündə böyük bir nəticəni göstərir. İnanıram ki, hamımız birlikdə DOST Agentliyi, DOST könüllüləri, nazirliyin nəzdində fəaliyyət göstərən könüllülər, eyni zamanda, könüllü təşkilatlar və digər qurumların könüllüləri birləşərək, inkişaf edərək dövlətin yanında olacaqlar və cəmiyyətə xidmət göstərəcəklər”.