"Azərbaycan Milli Ensiklopediyası" Elmi Mərkəzində "Şah İsmayıl Xətai - 535" adlı tarixi-elmi konfrans keçirilib.

AZƏRTAC xəbər verir ki, Bakı tarixinin tədqiqatçısı Xəyalə Günəş Əyriçalmalı konfransı giriş sözü ilə açaraq 18 Oktyabr - Müstəqilliyin Bərpası Günü münasibətilə konfrans iştirakçılarını təbrik edib.

Daha sonra Şah İsmayıl Xətainin Azərbaycan tarixindəki roluna həsr olunan konfrans haqqında qonaqlara ümumi məlumat verib. O, Şah İsmayıl Xətainin Azərbaycan dövlətçilik tarixində böyük xidmətləri olan görkəmli şəxsiyyət olduğunu vurğulayıb.

Tarix elmləri doktoru, professor Şahin Fazil Şah İsmayıl Xətainin həyat və fəaliyyətindən söz açıb, onun yaddaşlara millət, dövlət quruculuğu sahəsində bir necə mühüm strateji istiqaməti qovuşduran qüdrətli sərkərdə, dövlət xadimi kimi həkk edildiyini bildirib.

AMEA-nın Tarix İnstitutunun aparıcı elmi işçisi, ADPU-nun dosenti Mübariz Ağalarlı tarixi qaynaqlar əsasında Azərbaycan Səfəvi dövlətinin etno-siyasi, dini-ideoloji və mədəni həyatı haqqında olduqca əhəmiyyətli məlumatları qonaqların diqqətinə çatdırıb.

Tədbirdə iştirak edən ilahiyyatçı-alim, tədqiqatçı Soltan Əlizadə qazi, ilahiyyatçı Həsən Hüseyni Şah İsmayıl Xətainin həyat və yaradıcılığı barədə məruzələrlə çıxış edib, onu görkəmli şəxsiyyət, dövlət xadimi, sərkərdə, şair kimi xarakterizə ediblər.

Konfransda Şah İsmayıl Xətainin şeirləri alimlər tərəfindən səsləndirilərək təhlil edilib