Sosial Xidmətlər Agentliyinin tabeliyində 13 müəssisə fəaliyyət göstərir.

Bu ilin birinci yarısında sağlamlıq imkanları məhdud 5 yaşından 18 yaşınadək təhsilə cəlb olunmayan uşaqların yerləşdirildiyi 1 və 2 saylı Sağlamlıq imkanları məhdud uşaqlar üçün sosial xidmət müəssisələri 347 şəxsə sosial xidmət göstərib. Onlardan 126-sı qadın, 221-i isə kişidir.

AZƏRTAC xəbər verir ki, bunu Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin İdarə Heyətinin sədri Vüqar Behbudov Agentlikdə 2021-ci ilin 6 ayının yekunlarına və postmüharibə dövründə sosial xidmətlərə dair keçirilən mətbuat konfransında deyib.

V.Behbudov bildirib ki, 1, 2, 3, 4 saylı Psixonevroloji sosial xidmət müəssisələrinə psixi və yüngül formalı əqli pozuntuları ilə əlaqədar əlilliyi yaranan və əlilliklə əlaqədar özünəqulluq qabiliyyəti, habelə qulluq və kömək edə biləcək əmək qabiliyyətli qohumları və ya qanuni nümayəndələri olmayan 18 yaşdan yuxarı şəxslər qəbul edilir. Yarım il ərzində 453 nəfərə sosial xidmət göstərilib.

“2 saylı Psixonevroloji sosial xidmət müəssisəsi təmirdədir. Yekunlaşdıqda digər müəssisələr kimi orada da yüksəkkeyfiyyətli xidmətlərin göstərilməsi həyata keçiriləcək.

Ahıl şəxslər üçün sosial xidmət müəssisəsində Ahıllıqla əlaqədar özünəqulluq qabiliyyəti, habelə qulluq və kömək edə biləcək əmək qabiliyyətli qohumları və ya qanuni nümayəndələri olmayan 70 yaşdan yuxarı şəxslərə sosial xidmət göstərilir.

Müəssisə yarım il ərzində 224 nəfər şəxsə sosial xidmət göstərib. Bunlardan 115-i qadın, 109 nəfəri isə kişidir. 6 ay ərzində 11 nəfər daimi olaraq ailəsinə təhvil verilib.

Əlilliyi olan şəxslərin Peşə-Əmək Reabilitasiyası mərkəzi fiziki və yüngül formalı əqli və psixi pozuntuları olan 15-29 yaşlı əlilliyi olan şəxslərin peşə hazırlığı və peşə reabilitasiyasını həyata keçirir. Mərkəz yarım il ərzində 79 nəfər şəxsə sosial xidmət göstərib. Bunlardan 39-u qadın, 40 nəfəri isə kişidir.

El arasında “sığınacaq” kimi tanınan Həssas əhali qruplarından olan şəxslər üçün sığınacaq və sosial reabilitasiya müəssisəsi yarım il ərzində 193 nəfər şəxsə sosial xidmət göstərib. Bunlardan 63-ü qadın, 130 nəfəri isə kişidir. Altı ay ərzində 99 nəfər daimi olaraq ailəsinə təhvil verilib. Müəssisə 95 ədəd çarpayı ilə təmin olunub. Ötən həftə isə burada məişət zorakılığından zərər çəkmiş şəxslərin sosial reabilitasiyası şöbəsi fəaliyyətə başlayıb. 30 nəfər üçün nəzərdə tutulan şöbədə sakinlərin yaşayışı, sosial-reabilitasiyası tədbirlərinə cəlb olunmaları, mədəni-asudə vaxtının təşkili üçün müasir şərait yaradılıb. Burada sosial işçilər, hüquq məsləhətçisi, psixoloq, sosial pedaqoq, tibb bacısı və nəzarətçilər çalışacaq. Şöbədə məişət zorakılığı qurbanı ilə yanaşı, zəruri hallarda ailə üzvləri ilə birgə yaşaması üçün də şərait yaradılıb”, - deyə V.Behbudov diqqətə çatdırıb.