Dekabrın 10-da Azərbaycan Milli Xalça Muzeyində Rumıniyanın Azərbaycanın dövlət müstəqilliyini tanımasının 30 illiyi münasibətilə tədbir keçirilib.

AZƏRTAC xəbər verir ki, tədbir Rumıniyanın Azərbaycandakı səfirliyinin və Azərbaycan Milli Xalça Muzeyinin təşkilatçılığı ilə gerçəkləşib.

Mərasimdə Rumıniyanın görkəmli şairi Mihay Emineskunun Azərbaycan dilində nəşr olunmuş şeirlər kitabının təqdimatı keçirilib. Eyni zamanda, bir sıra xarici ölkələrin, o cümlədən Rumıniya rəssamlarının əsərlərindən ibarət tematik sərgiyə baxış olub.

Rumıniyanın Azərbaycandakı səfiri Vasile Soare bildirib ki, ölkəsi Azərbaycanın müstəqilliyini 1991-ci il dekabrın 11-də tanıyıb: “Biz səfirlik olaraq istədik ki, bu tarixi qeyd edək, çünki söhbət Rumıniya-Azərbaycan münasibətlərindən gedir. 30 il bundan öncə Azərbaycan çətin dövrlərini yaşayırdı, Sovet İttifaqının dağıldı bir zamanda Rusiyadan ayrılmağa çalışırdı. Rumıniya Türkiyədən sonra Azərbaycanın müstəqilliyini tanıyan birinci ölkədir. Azərbaycan bizim üçün qardaş ölkədir”.

Diplomat bildirib ki, bu münasibətlə Mihay Emineskunun rumın dilində yazdığı poetik nümunələr ilk dəfə bir ay ərzində Azərbaycan dilinə tərcümə olunub. Bu kitabı rumın universitetində təhsil almış azərbaycanlı tələbə tərcümə edib. Bu kitabın orijinallığı tək onun rumın dilindən tərcüməsində deyil, həm də rumın rəssamlarının əsər haqqında çəkdiyi, onu necə qavradıqlarını göstərən rəsmləridir. “Kitabı yaxşı dərk etmək üçün şəkillər gözəl vasitədir. Bu layihədən sonra Bakıda Rumıniya rəssamlarının sərgisi də açılacaq”.

Rumın şairi Mihay Emineskunun kitabının nəşrinin əlamətdə hadisə olduğunu deyən şair, tərcüməçi Səlim Babullaoğlu bildirib ki, dövlətlər arasında dostluq insanlar arasındakı münasibətə bənzəyir. “Rumıniya ilə biz 30 illik dostluğumuzu yaşadıq. Bu illər ərzində biz hər zaman Rumıniyanı yanımızda gördük. İnsanlar ölsə də şeir əbədidir”,- deyə Səlim Babullaoğlu vurğulayıb.

Kitabın Jalə İsmayılın sətri tərcümələri əsasında ərsəyə gətirdiyini deyən Səlim Babullaoğlu bildirib ki, bir ay ərzində bu tərcümələrə poetik məzmun verib. Qeyd edib ki, tərcümə zamanı şeirin metrik ölçüləri saxlanılıb.

Sonra Səlim Babullaoğlu kitabdan bir parça şeir oxuyub.

Azərbaycan Milli Xalça Muzeyin direktoru Şirin Məlikova bildirib ki, ölkələr arasında müxtəlif səviyyələrdə münasibətlərin yaranması sevindirici haldır. Xalça Muzeyində belə bir mötəbər tədbirin keçirilməsi hər iki ölkə arasında olan dustluğu daha da möhkəmləndirir. “Azərbaycanı yaxşı tanımaq üçün Milli Xalça Muzeyini ziyarət etmək vacibdir. Rumıniya səfirinin muzeyimizi ziyarət etməsi bizim ölkəyə göstərdiyi marağı əks etdirir”,- deyə Şirin Məlikova əlavə edib.

Rumıniyada ali təhsil almış, Mihay Emineskunun şeirlərini sətri tərcümə edən Jalə İsmayıl deyib: “Rumıniya elə bir ölkədir ki, onu sevməmək mümkün deyil. Xarici ədəbiyyatla maraqlananlar çox güman ki, Mihay Emineskunun yaradıcılığı ilə tanışdır. O, rumın ədəbiyyatının “dan ulduzu”, Avropanın sonuncu romantiki sayılır. Mənim sətri tərcümələrim belə qalsaydı onu heç kəs oxumazdı. Səlim Babullaoğluna sətri tərcümələrimə poetik rəng qatdığı üçün təşəkkür edirəm”.

İncəsənət və İrs Assosiasiyasının prezidenti Nikoleta Zagura bildirib ki, Rumıniyada xalça mədəni irs sayılır. Bu layihəni Xalça Muzeyində keçirmək olduqca vacibdir: “İnanıram ki, muzeyin gizli bir guşəsində nağıllarda olduğu kimi “uçan xalça” saxlanılır və bu xalça ölkələr arasında mədəni körpü yaratmağa kömək edir”.

Xalçanın insan həyatında vacib bir atribut olduğunu deyən Nikoleta Zagura bildirib ki, xalça hər kəsi qəbirə qədər müşayiət edir: “Üzərində gəzdiyimiz xalça qəbirdə bizi öz ağuşuna alır”.

Sonra iştirakçılar muzeylə yaxından tanış olublar.