Sentyabrın 30-da Təhsil Nazirliyinin Respublika Uşaq-Gənclər İnkişaf Mərkəzinə mediatur təşkil olunub.

AZƏRTAC xəbər verir ki, əvvəlcə KİV-lərin nümayəndələri Uşaq-Gənclər İnkişaf Mərkəzindəki dərnəklərin fəaliyyəti ilə tanış olub, əyani tədris prosesini izləyiblər.

Respublika Uşaq-Gənclər İnkişaf Mərkəzinin direktoru Firuzə Sultanzadə məktəbdənkənar təhsil müəssisələrində də tədris və təlim-tərbiyə prosesinin ənənəvi şəkildə başlandığını deyib, rəhbərlik etdiyi mərkəzin fəaliyyət istiqamətləri barədə məlumat verib. O bildirib ki, Respublika Uşaq-Gənclər İnkişaf Mərkəzi 2016-cı ildə ümumilikdə 8 mərkəzin birgə bazasında yaradılaraq (Respublika Ekoloji Tərbiyə və Təcrübəçilik Mərkəzi, Respublika Gənc Turistlər və Diyarşünaslıq Mərkəzi, T.İsmayılov adına Uşaq-Gənclər Yaradıcılıq Sarayı və digər 5 məktəbdənkənar mərkəz) fəaliyyətə başlayıb. Əsas vəzifəsi uşaq və gənclərin asudə vaxtlarının səmərəli təşkili, elmi-texniki biliklərinin artırılması, intellektual və yaradıcılıq potensialının inkişaf etdirilməsi, onlarda müasir texnologiyaları çevik mənimsəmək istedadının, sağlam həyat tərzinin və ətraf mühitə məsuliyyətli münasibətin formalaşdırılmasıdır. Eyni zamanda, rəssamlıq, rəqs, texnologiya və innovasiyalara, ətraf mühitin qorunmasına və öyrənilməsinə, davamlı turizmə, elmi-texniki yaradıcılığa uşaq və gənclərin maraq və həvəsinin artırılmasıdır. Mərkəz uşaq, yeniyetmə və gənclərin iştirakı ilə “Ekoklub”ların və müxtəlif profilli dərnəklərin məşğələlərini təşkil edir, beynəlxalq və respublika səviyyəli müsabiqələr, intellektual oyunlar, breyn-rinq bilik yarışları, olimpiadalar, yay məktəbləri, düşərgələr və digər maarifləndirici silsilə tədbirlər, bir sıra yerli və beynəlxalq layihələr həyata keçirir. Mərkəzdə 350-yə yaxın əməkdaş çalışır. Üç dildə (Azərbaycan, rus və ingilis) məşğələlər keçirilən mərkəzin 400 dərnəyi uşaqların xidmətindədir. Ümumilikdə müxtəlif istiqamətli dərnəklərdə 6 min uşaq məşğul olur. Uşaq və gənclər ölkədaxili və beynəlxalq sərgilərdə, Avropa və dünya çempionatlarında, olimpiya yarışlarında iştirak edirlər. Məşğələlər beynəlxalq ekspertlər, respublikanın tanınmış müəllimləri və incəsənət xadimləri tərəfindən tədris edilir.