“Böyük Qayıdış” Gənclər Təşkilatının həyata keçirdiyi “Qazilərlə bir gün” layihəsi çərçivəsində Quba və Xaçmazdan olan Vətən müharibəsi qazilərinin bir qrupunun Bakıya səfəri təşkil edilib.

AZƏRTAC xəbər verir ki, səfər çərçivəsində I və II Fəxri xiyaban, Şəhidlər xiyabanı və Hərbi Qənimətlər Parkı ziyarət olunub, rəsmilərlə görüşlər və qazilər üçün şəhər turu təşkil edilib.

Layihə iştirakçıları əvvəlcə I Fəxri xiyabanda ümummilli lider Heydər Əliyevin məzarı önünə gül dəstələri düzüb, Ulu Öndərin xatirəsinə dərin ehtiramlarını bildiriblər.

Sonra Şəhidlər xiyabanı və ikinci Fəxri xiyaban ziyarət olunub, Azərbaycanın müstəqilliyi və ərazi bütövlüyü uğrunda canlarından keçən şəhidlərimizin əziz xatirəsi dərin ehtiramla yad edilib.

Ziyarətin davamında qazilərlə rəsmilərin iştirakı ilə qeyri-rəsmi formatda görüş keçirilib.

Görüşdə Azərbaycan Respublikasının Gənclər Fondunun icraçı direktorunun müavini Orxan Ərəbov, deputatlar Vahid Əhmədov, Eldəniz Səlimov, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə əlaqələr şöbəsinin baş zabiti, kapitan Tofiq Əzizov iştirak ediblər.

Çıxışlarda Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılmış tarixi zəfərin əhəmiyyətindən, qazilərimizin bu qələbədə rolundan, post-müharibə dövründə dövlətin və cəmiyyətin üzərinə düşən vəzifələrdən, həmçinin Vətən müharibəsi iştirakçılarına dövlət dəstəyindən danışıblar.

Sonra qazilərin və könüllü gənclərin iştirakı ilə Müzəffər Azərbaycan Ordusunun şanlı qələbəsinin canlı muzeyi olan Hərbi Qənimətlər Parkı ziyarət olunub və qazilər üçün şəhər turu təşkil edilib.

Layihə Azərbaycan Respublikasının Gənclər Fondunun dəstəyi ilə “Böyük Qayıdış” Gənclər Təşkilatı tərəfindən həyata keçirilir. Bu günədək layihə çərçivəsində təşkilat tərəfindən paytaxtda və regionlarda könüllü gənclərin iştirakı ilə qazilərlə görüşlər keçirilib, həmçinin Gəncə, Mingəçevir, Şəki və Şamaxıdan olan Vətən müharibəsi qazilərinin Bakıya səfəri təşkil edilib. Növbəti günlərdə digər regionlardan olan qazilərin də Bakıya səfərlərinin təşkili nəzərdə tutulur.

Layihənin əsas məqsədi Vətən müharibəsində sağlamlığını itirmiş qaziləri qayğı ilə əhatə etmək, qəhrəman qaziləri cəmiyyətdə, xüsusilə gənclər arasında tanıtmaq, gənclərin Vətən uğrunda döyüşən insanlara dəstəyini artırmaq, onların cəmiyyətə reinteqrasiyasına dəstək olmaqdır.