Martın 21-də Qobustan Milli Tarix-Bədii Qoruğunda “Plov” festivalı keçirilib.

AZƏRTAC xəbər verir ki, Qobustanın simvolu - Bahar qızı qonaqları bayram münasibətilə təbrik edib. Festivalda igidlik, qəhrəmanlıq simvolu olan İkinci Qarabağ müharibəsi qazisi bayram məşəlini mədəniyyət nazirinin birinci müavini Elnur Əliyevə təqdim edib, bayram tonqalı alovlandırılıb.

Mədəniyyət nazirinin birinci müavini Elnur Əliyev çıxış edərək bildirib ki, Qobustan Milli Tarix-Bədii Qoruğu Azərbaycanın UNESCO-nun Dünya Mədəni İrs siyahısına daxil olmuş dünya əhəmiyyətli abidəsi olmaqla yanaşı, həm də minilliklər ərzində xalqımızın adət-ənənələrini, folklorunu, etnoqrafiyasını qayaüstü təsvirlər vasitəsilə bu günümüzə çatdıran sakral məkanlardan biridir.

"Tədqiqatçılar Qobustan qoruğunun Tunc dövrünə aid qayaüstü təsvirlərində Novruz bayramı ərəfəsində oynanılan “Kosa oyunu”, etnoqrafik ədəbiyyatda “Təkə oyunu” və ya “Təkəçi mərasimi” adlandırılan xalq oyununun qədim növünün əks olunduğunu hesab edir. Bu fakt onu deməyə əsas verir ki, ən azı Tunc dövründən başlayaraq Qobustan bahar bayramının və digər xalq mərasimlərinin keçirildiyi məkan olub. Novruz bayramı Azərbaycan xalqının adət-ənənələrinin, zəngin maddi və mənəvi dəyərlərinin mühüm bir hissəsini özündə ehtiva edən mədəniyyət hadisəsidir. Bu, həm də bizim milli mədəniyyətimizin, humanist dəyərlərimizin və zəngin mətbəx mədəniyyətimizin dünyaya çatdırılması istiqamətində önəmli bir hadisədir".

Sonra çıxış edən Tacikistanın Azərbaycandakı səfiri Rustam Soliyev festivalda iştirakından məmnunluğunu ifadə edib, Azərbaycan xalqına Novruz bayramı münasibətilə xoş arzularını çatdırıb.

Festivalda “Şah plov”, “Döşəmə plov”, “Şüyüd plov”, “Fisincan plov”, “Boranı plov”, “Çığırtma plov” kimi Azərbaycan mətbəxinə aid plov nümunələri, həmçinin Hindistan, Qətər və Tacikistan mətbəxinə aid plov nümunələri iştirakçılara təqdim olunub, onlar haqqında ətraflı məlumat verilib.

Novruzun personajları - Kosa və Keçəlin məzhəkəsi, məzəli deyişmələri, kəndirbazların şouları, Azərbaycan Dövlət Kukla Teatrının aktyorlarının və Qaradağ rayonu Qobustan qəsəbəsində yerləşən Aşıq Rza Qobustanlı adına Mədəniyyət evinin üzvlərinin ifasında səhnəciklər, musiqiçilərin ifasında konsert proqramı, Lənkəranın "Nənələr" folklor və rəqs kollektivinin çıxışları və uşaqlar üçün kəndirdartma oyunları festival iştirakçılarına bayram ovqatı, şən əhval-ruhiyyə bəxş edib.

Tədbirdə, həmçinin uşaqların əl işlərindən ibarət rəsm sərgisi təşkil olunub, əl işlərinin və suvenirlərin satış yarmarkası keçirilib.