Qida Təhlükəsizliyi Agentliyinin “Açıq qapı” layihəsi davam edir.

AZƏRTAC xəbər verir ki, Ümumdünya Qida Təhlükəsizliyi Günü ilə əlaqədar Agentliyin tabeliyində fəaliyyət göstərən Qida Təhlükəsizliyi İnstitutunda “Açıq qapı” günü keçirilib.

Tədbir həmin beynəlxalq günün mahiyyətinə, o cümlədən qida təhlükəsizliyinin insan sağlamlığında oynadığı rola, bu sahədə risklərin vaxtında aşkarlanması və qarşısının alınması üçün zəruri tədbirlərə diqqət çəkmək, həmçinin bu sahədə ölkəmizdə görülən işlərlə əlaqələndirmək və daha geniş auditoriyanı məlumatlandırmaq məqsədi daşıyıb.

“Açıq qapı” günündə iştirakçılar İnstitutun laboratoriyalarına baxış keçirib, laboratoriyaların maddi-texniki bazası ilə yaxından tanış olublar. Həmçinin iştirakçılar qida məhsullarının yoxlanılması prosesində iştirak etməklə, qida məhsullarının laboratoriyalara qəbulundan başlayaraq son müayinə nəticələrinə qədər keçdiyi bütün mərhələləri əyani şəkildə izləyiblər.

Tədbir iştirakçılarına İnstitutun fəaliyyəti, eləcə də qida zəncirinin bütün mərhələlərində fəaliyyət göstərən subyektlərdə qida təhlükəsizliyi göstəriciləri üzrə aparılan tədqiqatlar, qida təhlükəsizliyi sahəsində həyata keçirilən elmi-praktiki araşdırmalar haqqında ətraflı məlumat verilib. Qeyd edilib ki, hazırda Qida Təhlükəsizliyi İnstitutunun nəzdində qida təhlükəsizliyi, kompleks müayinələr, heyvan və bitki sağlamlığı üzrə ümumilikdə 16 laboratoriya və regional bölmə fəaliyyət göstərir. Həmin laboratoriyaların maddi-texniki bazasının gücləndirilməsi, modernləşdirilməsi, fəaliyyətinin optimallaşdırılması, eyni zamanda kadrların səriştəliliyinin artırılması sahəsində mütəmadi tədbirlər həyata keçirilir. Aparılan müayinə nəticələrinin düzgünlüyü və etibarlılığının təmin olunması, laboratoriyaların akkreditasiyadan keçməsi, beynəlxalq standartlara uyğunlaşdırılması, həmçinin işçi heyətin səriştəliliyinin artırılması məqsədilə laboratoriyaların beynəlxalq laboratoriyalararası səriştəlilik sınaqlarında iştirakı üzrə işlər davam etdirilir.

“Açıq qapı” günü iştirakçıları maraqlandıran sualların cavablandırılması ilə başa çatıb.