Qida Təhlükəsizliyi Agentliyi növbəti dəfə “Könüllü Qida Nəzarətçisi” proqramı çərçivəsində könüllü qəbulu elan edir.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, layihənin məqsədi könüllülərin qida təhlükəsizliyinin təmin olunması prosesində nəzarətçi qismində aktiv iştirakını təmin etmək, onların bu sahə ilə bağlı biliklərini artırmaq və ən əsası qida təhlükəsizliyinin təmin olunması prosesinə gəncləri könüllü qismində cəlb etməkdir. Proqrama cəlb olunan tələbələr layihədə dərsdənkənar - asudə vaxtlarında iştirak edəcək, gələcək karyeraları üçün bilik və bacarıqlarla yanaşı, təcrübə qazanacaqlar.

Proqramda könüllü qismində iştirak etmək üçün 16-25 yaşarası, təhsil müəssisələrində təhsil alan və ya təhsilini ən azı 2 il əvvəl bitirmiş gənclərin müraciəti qəbul olunur.

Qeyd edək ki, “Könüllü Qida Nəzarətçisi” olmaq istəyən gənclər agentliyin rəsmi internet portalına (afsa.gov.az) daxil olub “Könüllülər” bölməsində qeydiyyatdan keçərək müraciət edə bilərlər.