Koronavirus infeksiyasının yarada biləcəyi təhlükəni aradan qaldırmaq məqsədilə ölkə ərazisində tətbiq edilən xüsusi karantin rejimi qaydalarının təmin olunması üçün Qəbələ rayonunda nəzarət və maarifləndirmə tədbirləri davam etdirilir.

Rayon icra hakimiyyətindən AZƏRTAC-ın bölgə müxbirinə bildirilib ki, mobil qruplar tərəfindən mütəmadi olaraq keçirilən reydlər zamanı Operativ Qərargah tərəfindən müəyyən edilən tələb və qaydaların təmin edilməsi, sosial məsafənin qorunması, tibbi maskalardan istifadənin zəruriliyi vətəndaşların diqqətinə xüsusi olaraq çatdırılır.

Son iki gündə rayonda 106 ticarət, həmçinin əhalinin daha çox müraciət etdiyi 118 digər təyinatlı obyektə baxış keçirilib. Reydlərin nəticəsi olaraq, 4 nəfər ictimai iaşə obyektinin, 2 nəfər yanacaqdoldurma məntəqəsinin, bir nəfər avtomobil təmiri müəssisəsinin və bir nəfər bərbərxana köşkünün işçisi İnzibati Xətalar Məcəlləsinin müvafiq maddəsi ilə 100 manat məbləğində cərimə olunub. Bundan əlavə, dünyasını dəyişmiş 6 mərhumun ailəsinə yas mərasimlərinin keçirilməməsi ilə bağlı xəbərdarlıqlar edilib.

Nazirlər Kabineti yanında Operativ Qərargahın tələblərinin yerinə yetirilməsi vəziyyətinin öyrənilməsi məqsədilə rayonda reydlər və maarifləndirmə tədbirləri davam etdirilir.