Vətən müharibəsi başlayanda hər bir azərbaycanlı gənc kimi mən də könüllü olaraq ön cəbhəyə yola düşdüm.
×
Vətən müharibəsi başlayanda hər bir azərbaycanlı gənc kimi mən də könüllü olaraq ön cəbhəyə yola düşdüm. Sentyabrın 29-dan müharibədə iştirakım başlasa da, aktiv döyüşlərə oktyabrın 3-dən qoşuldum. Tərtər rayonunun Talış kəndi və Suqovuşan qəsəbəsi uğrunda gedən hərbi əməliyyatlarda iştirak etdim. Oktyabrın 7-də Suqovuşan qəsəbəsi istiqamətində gedən döyüşlər zamanı yaralandım. Sonacan döyüşmək istəsəm də, təəssüf ki, yaralarım buna imkan vermədi. Lakin sevinirəm ki, 44 şərəfli gün möhtəşəm Zəfərlə yekunlaşdı.
Bunu AZƏRTAC-a müsahibəsində Vətən müharibəsi qazisi Abbas Abbaslı deyib.
Hazırda ikinci qrup əlil olduğunu bildirən qazi özünüməşğulluq proqramına müraciət etdiyini və təlimlərə qoşulduğunu diqqətə çatdırıb: “Özünüməşğulluq proqramına təkər təmiri və balans aparatları ilə bağlı müraciət etdim. Bununla əlaqədar təlimləri uğurla bitirdim və imtahandan keçdim. Bu gün isə məni çağırıb avadanlıqlarla təmin etdilər. Dəstək olan hər kəsə minnətdaram”.
A.Abbaslı “YAŞAT” Fonduna müraciət etdiyini və müraciətinə müsbət cavab verilərək kömək göstərildiyini də diqqətə çatdırıb.