Natiq Əsgərov Yevlax rayonunda doğulub. Ötən əsrin 90-cı illərində Füzuli rayonunda gedən döyüşlərdə iştirak edərək yaralanıb. Hazırda ikinci qrup əlildir.

Dekabrın 8-də Əmək və Əhalinin Sosial Müdafiəsi Nazirliyi tərəfindən müharibə əlili kimi ona "Xəzər" markalı avtomobil təqdim edilib.

“Müharibə əlillərinə göstərilən bu diqqət və qayğıya görə Prezident, Ali Baş Komandan İlham Əliyevə çox böyük minnətdarlıq edirəm. Onun rəhbərliyi ilə Azərbaycan Milli Ordusu sentyabrın 27-dən noyabrın 10-dək çox böyük hünər və rəşadət nümunəsi göstərdi. Mən Birinci Qarabağ müharibəsinin iştirakçısıyam. O vaxt erməni quldur birləşmələrinə layiqli cavab vermək, onları yerində oturtmaq, torpaqlarımızı onların işğalından xilas etmək bizə nəsib olmadı. Çox sevincliyəm ki, o vaxt bizim görə bilmədiyimiz iş bugünkü nəsil şərəflə icra edərək yeni tarix yazdı. Həm də ona görə sevincliyəm ki, qalib ordumuzun əsgərləri arasında mənim oğlum da var. O, indi də döyüş bölgəsində Vətən qarşısındakı xidmətini davam etdirir. Belə qəhrəman oğulları, belə güclü ordusu, belə Sərkərdəsi olan xalqla fəxr etməyə dəyər”,- deyə Natiq Əsgərov AZƏRTAC-ın müxbiri ilə söhbətində deyib.

Qarabağ qazisi ona göstərilən qayğıdan razılıq edərək deyib: “Müharibə veteranı kimi hər cür qayğı ilə əhatə olunmuşam, bu gün də “Xəzər” avtomobilini açarlarını aldım. Milli Ordumuzun Qarabağı erməni qəsbkarlarından təmizləməsi məndə çox böyük ruh yüksəkliyi yaradıb. İkinci Qarabağ müharibəsində xalqımızın qazandığı möhtəşəm qələbə qəlbimizi iftixar hissi ilə doldurub. Həmin qələbənin qazanılmasında əməyi olan bütün döyüşçülərimizin qarşısında baş əyərək “sizlərə halal olsun” deyirəm”.