Noyabrın 5-də Bakıda Azərbaycanda Qadın Sahibkarlığının İnkişafı Assosiasiyasının (AQSİA) təşkilatçılığı ilə Zəfər Gününün ildönümü münasibətilə tədbir keçirilib.

AZƏRTAC xəbər verir ki, tədbirdə Azərbaycanın Dövlət Himni səsləndirilib. Sonra AQSİA-nın illik fəaliyyəti haqqında videoçarx nümayiş olunub.

Azərbaycanda Qadın Sahibkarlığının İnkişafı Assosiasiyasının İdarə Heyətinin sədri Səkinə Babayeva Zəfər Gününün bir illiyi münasibətilə tədbir iştirakçılarını təbrik edib.

S.Babayeva Assosiasiyanın bir il ərzində gördüyü işlərdən danışıb. Qeyd edib ki, Assosiasiya olaraq hər bir qazi ailəsi və şəhid ailələri ilə görüşlər keçirilib, onlara maddi və mənəvi dəstək göstərilib.

Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, bir neçə gündən sonra hamımızın illərlə gözləyidimiz Azərbaycan torpaqlarının işğaldan azad edilməsinin bir ilini qeyd edəcəyik. Bu Zəfər Azərbaycan tarixinə, hərb tarixinə, dünyanın ictimai-siyasi tarixinə qızıl hərflərlə yazılıb.

Milli Məclisin Ailə, qadın və uşaq məsələləri komitəsinin sədri Hicran Hüseynova bildirib ki, 44 günlük müharibədə əldə edilmiş Qələbə xalqımızın Qələbəsi olmaqla yanaşı dünyaya və bütün regiona nəfəs verdi. Azərbaycan qadının şücaətindən danışan H.Hüseynova bildirib ki, hər bir şəhid anasının dilindən ancaq bir söz eşitdik: “Vətən sağ olsun!”.

H.Hüseynova vurğulayıb ki, Azərbaycanda Qadın Sahibkarlığının İnkişafı Assosiasiyasının üç illik fəaliyyətinə baxmayaraq gördüyü işlər təqdirə layiqdir. 44 günlük müharibədə və sonrakı dövrdə sahibkar qadınlarımız şəhid ailələrinə, qazilərimizə həmişə dəstək olublar.

Tədbirdə yeddi nəfərə Milli KSM (Korporativ Sosial Məsuliyyəti) mükafatı təqdim edilib, sahibkar qadınların əl işlərindən ibarət sərgi nümayiş olunub.