Azərbaycan təmsilçiləri Samirə Qəhrəmanova və Milana Minakovskaya Bakıda keçirilən idman gimnastikası üzrə dünya kuboku yarışlarının gimnastika tiri yarışlarında çıxışlarını təqdim ediblər.

AZƏRTAC xəbər verir ki, təsnifat mərhələsində mübarizə aparan təmsilçilərimiz – M.Minakovskaya 10,300 xalla 20-ci, S.Qəhrəmanova isə 10,100 xalla 22-ci pillədə qərarlaşıblar.

Hazırda qadın gimnastlar arasında gimnastika tiri yarışlarının təsnifat mərhələsinə Ukrayna təmsilçisi Daniela Batrona 13,433 xalla başçılıq edir.

Turnirdə 34 ölkədən 145 idmançı qüvvəsini sınayır. Dörd gün davam edəcək yarışların ilk iki günündə təsnifat, sonrakı iki günündə isə final mərhələləri baş tutacaq.

Turnirdə, həmçinin ən yüksək icra xalını toplamış gimnastlara ənənəvi “AGF Trophy” kuboku da təqdim olunacaq.

Dünya kubokunda ölkəmizi Mənsum Səfərov (sərbəst hərəkətlər), Ağamurad Qəhrəmanov (sərbəst hərəkətlər, dayaqla tullanma, paralel qollar, turnik), İvan Tixonov (dəstəkli at, dayaqlı tullanma, paralel qollar, turnik), Cavidan Babayev (halqa), Nikita Simonov (halqa), Samirə Qəhrəmanova (dayaqlı tullanma, gimnastika tiri, sərbəst hərəkətlər), Milana Minakovskaya (müxtəlif hündürlüklü qollar, gimnastika tiri, sərbəst hərəkətlər) təmsil edirlər.