Dövlətimizin başçısı İlham Əliyevin ötən gün imzaladığı “Məhkum edilmiş bir sıra şəxslərin əfv olunması haqqında” Sərəncamı Ədliyyə Nazirliyi Penitensiar Xidmətinin 17 saylı cəzaçəkmə müəssisəsində də icra olunub.

AZƏRTAC xəbər verir ki, həmin cəzaçəkmə müəssisəsində 7 nəfər azadlığa buraxılıb.

Əfv olunan şəxslərə sənədlərini Penitensiar Xidmətinin rəis müavini Oqtay Məmmədov, ombudsman Səbinə Əliyeva və Milli Məclisin deputatı Zahid Oruc təqdim edib.

Azadlığa buraxılanlardan 4-ü "Gəncə hadisələri"nə görə həbs edilmişdir.

Qeyd edək ki, Sərəncam çərçivəsində humanizm prinsipləri əsas götürülərək ümumilikdə 213 nəfər əfv edilib.