Paytaxtımızda keçirilən akrobatika gimnastikası üzrə 12-ci dünya yaş qrupları yarışlarında kişi cütlüklər arasında finalçılar müəyyənləşib.

AZƏRTAC xəbər verir ki, 12-18 yaş kateqoriyasında mübarizə aparan cütlüklərin həm temp, həm də balans hərəkətləri üzrə təsnifat yarışında uğurla çıxış edən 8 komanda həlledici mərhələyə adlayıb.

Martın 5-də keçiriləcək həlledici mərhələdə Böyük Britaniya, Rusiya, İsrail, Portuqaliya, Bolqarıstan, Qazaxıstan, ABŞ və Kanada komandaları medallar uğrunda mübarizə aparacaqlar.

Rəsul Seyidli və Rəvan Zeynallıdan ibarət azərbaycanlı cütlük ümumi təsnifat mərhələsində 48,290 xalla 13-cü olub və finaldan kənarda qalıb.

Martın 6-dək davam edəcək yarışda idmançılar 12-18 və 13-19 yaş qrupları üzrə kişi cütlükləri, qadın cütlükləri, qarışıq cütlüklər, kişi qrupları, qadın qrupları proqramında qüvvələrini sınayacaqlar.

Turnirdə Azərbaycanı 12-18 yaş kateqoriyasında Rəsul Seyidli, Rəvan Zeynallıdan ibarət kişi cütlüyü, Nəzrin Qasımova, Xanım Məmmədzadədən ibarət qadın cütlüyü, Milana Əliyeva, Nizam Xamidulindən ibarət qarışıq cütlük, Anahita Başiri, Zəhra Rəşidova, Nəzrin Zeyniyevadan ibarət qadın qrupu və 13-19 yaş kateqoriyasında Leyla Bəşirova, Nəzrin Fərmanova, Mənsumə Məmmədzadədən ibarət qadın qrupu təmsil edəcək.

Ölkəmizdə ilk dəfə təşkil olunan yarışda 24 ölkədən 438 idmançı iştirak edir.

Qeyd edək ki, yarış Azərbaycan Respublikası Nazirlər Kabinetinin xüsusi icazəsi ilə ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun, tamaşaçı iştirakı olmadan keçirilir.