Dekabrın 18-də Heydər Əliyev Fondu və Mədəniyyət Nazirliyinin təşkilatçılığı ilə keçirilən “Mədəni irs” Forumu çərçivəsində “Təsviri sənət və müasir çağırışlar” mövzusunda panel sessiya təşkil edilib.

AZƏRTAC xəbər verir ki, “Yeni Qallery” Bakı İncəsənət Mərkəzinin rəhbəri, sənətşünas Rafael Gülməmmədovun moderatorluğu ilə keçirilən tədbirdə Azərbaycan Dövlət Rəssamlıq Akademiyasının rektoru, Xalq rəssamı, professor Natiq Əliyev Forumda əsas məsələlərdən birinin də incəsənət sahəsi üzrə təhsilə həsr olunmasını yüksək dəyərləndirib.

O, “Heydər Əliyev İli” çərçivəsində Akademiyada elmi konfranslar və digər tədbirlərin keçirildiyini söyləyib: “Biz Ulu Öndər Heydər Əliyevə həsr olunmuş sərgi təşkil etmişik. Bu sərgi həmçinin dekabrın 15-də Türkiyənin İstanbul şəhərində nümayiş olunub”.

Onun sözlərinə görə, müasir dövrdə akademik təhsildən söhbət gedirsə, akademiya çərçivəsində xaricdən rəssamlar dəvət olunmalı və onlar tələbələrə ustad dərsləri keçməlidir. O əlavə edib ki, son dövrdə xaricdən dəvət olunmuş rəssamların Bakıda master-klassları təşkil olunur.

Natiq Əliyev qeyd edib ki, rəhbərlik etdiyi akademiya həmçinin Azərbaycanın bir çox incəsənət ocaqları ilə birlikdə sərgilər təşkil edir: “Biz Üzeyir Hacıbəyli adına Bakı Musiqi Akademiyası ilə birgə tələbələrin sərgilərini açmışıq, həmçinin Qarabağ Dirçəliş Fondu ilə müsabiqə keçirmişik”.

Rektor son dövrlərdə təsviri sənətə qızların marağının artdığını deyib və interyer-dizayn sahəsinə axının çox olduğunu söyləyib.

Xalq rəssamı Hüseyn Haqverdiyev onu narahat edən mövzuya toxunub: “Bakı gözəl şəhərdir, təzə memarlıq abidələri tikilir. Azərbaycanda çoxlu rəssamlar, heykəltəraşlar var. Şəhərlər tikilir, binalar yüksəlir. Amma bu işlərdə rəssamın imzasının olmaması məni narahat edir. Bu gün monumental sahədə işlər görülmür və dekorativ heykəllərin olmaması ürəkaçan hal deyil".

Azərbaycanda rəssamların sayının kifayət qədər çox olduğunu diqqətə çatdıran H.Haqverdiyev, fırça ustalarının əl işlərinin tez-tez nümayiş olunmasının vacibliyini vurğulayıb. “İnsanlar rəssamların zəhmətini görmürlər. Problemin həlli üçün çoxlu müsabiqələr keçirilməlidir", - deyə Xalq rəssamı əlavə edib.

O qeyd edib ki, indiki dövrdə müasir materiallardan istifadə olunmalıdır.

Xalq rəssamı Eldar Mikayılzadə Heydər Əliyev Fondunun Azərbaycanda xalça sənətinə verdiyi töhfələri yüksək qiymətləndirib: “Gənc sənətkarların yaratdığı əsərlər ölkədə aparılan mədəniyyət siyasətinin nəticəsidir. Son 3 il ərzində ərazi bütövlüyünü və suverenliyini bərpa edən Azərbaycanda mədəni irsin, tarix və ümumilikdə mədəniyyətin qorunması istiqamətində görüləcək işlərə daha həssas, sistemli və kompleks yanaşılmalı, kadr hazırlığına xüsusi diqqət yetirilməli, elmi araşdırmaların sayı və keyfiyyəti də artırılmalıdır”.

Rəssam Anar Hüseynzadə Mədəniyyət Nazirliyinin təşkilatçılığı ilə rəssamların Qarabağa səfərlərinin təşkil oldunğunu deyib: “Yaradıcı insanların ermənilərin Qarabağdakı vandalizm nümunəsini görməsi çox təsirlidir”.

A.Hüseynzadə rəssamların yaşadığı bir sıra problemlər haqda da danışıb: “Düşünürəm ki, rəssamların kifayət qədər sənət əsəri olsa da, onlar bu əsərləri sata bilmirlər. Dövlət Rəssamlıq Akademiyasında gənc rəssamlara marketinq üzrə dərslər keçirilməlidir. Bizneslə məşğul olan şəxslər və rəssamlar arasında mübadilə yaranmalıdır”.

Sonda panel sessiya müzakirələrlə davam edib.