Özbəkistanın Azərbaycandakı səfiri Baxrom Aşrafxanovun rəhbərlik etdiyi nümayəndə heyəti Qubadakı Meyvəçilik və Çayçılıq Elmi-Tədqiqat İnstitutunda olub.

AZƏRTAC-ın bölgə müxbiri xəbər verir ki, institutun direktoru İlham Qurbanov və Biotexnologiya laboratoriyasının müdiri Sevil Süleymanova qonaqlara ölkəmizdə son illər kənd təsərrüfatı sahəsində aparılan islahatlar haqqında məlumat verib, Azərbaycanda ilk dəfə institut tərəfindən icra olunan “Ağıllı bağ” layihəsi, burada yaradılan laboratoriya və istixananın fəaliyyət istiqamətlərindən danışıblar.

Səfərin məqsədi Meyvəçilik və Çayçılıq Elmi-Tədqiqat İnstitutu ilə tanışlıq və birgə əməkdaşlıq imkanlarının müəyyənləşdirilməsi olub. Sonda institutun əməkdaşları xarici qonaqlarla birgə bağlara və tinglik sahələrinə baxış keçiriblər.