İcbari tibbi sığortanın tətbiq olunduğu tibb müəssisələri tərəfindən İcbari Tibbi Sığorta üzrə Dövlət Agentliyinə təqdim edilən ilkin hesabatlara əsasən, ötən ilin dekabr ayı ərzində 58 şəhər və rayonda 383 min 847 vətəndaşa 1 milyon 393 min 882 tibbi xidmət göstərilib. Bu müddətdə tibb müəssisələri, onların struktur bölmələri və müalicə diaqnostika mərkəzlərinə 624 min 85 müraciət daxil olub.

AZƏRTAC xəbər verir ki, bu barədə İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentinin rəhbəri Aynurə Əhmədova bu gün keçirilən mətbuat konfransında deyib.

Qeyd edilib ki, müraciətlər üzrə tibbi xidmətlərin 1 milyon 201 min 415-i ambulator, 192 min 467-si isə stasionar şəraitdə göstərilib. 2021-ci ilin dekabr ayı üzrə həmin regionlara dair əhaliyə göstərilən tibbi xidmətləri əks etdirən bir neçə statistik göstəricini təqdim edirik:

Əhalinin hər 1000 nəfərinə tibb müəssisələrinə olunan müraciət sayına əsasən, ilk onluqda yer alan şəhər və rayonlar: Mingəçevir (446), Gəncə (244), Beyləqan (202), Yevlax (193), Şirvan (171), Göyçay (161), Qəbələ (161), Xocavənd (157), Balakən (157) və Qax (155).

Ən çox xidmət göstərmiş tibb müəssisələrinin ilk onluğu: Gəncə Şəhər Birləşmiş Xəstəxanası (150 min 677), Mingəçevir Şəhər Mərkəzi Xəstəxanası (134 min 606), Yevlax (61 min 830), Xaçmaz (61 min 10), Quba (56 min 325), Göyçay (44 min 894), Bərdə (44 min 21), Şəki (41 min 418), Zaqatala (40 min 255) və Ağdaş (37 min 941) rayon mərkəzi xəstəxanaları.

Ən çox ambulator xidmət göstərmiş tibb müəssisələrinin ilk onluğu: Gəncə Şəhər Birləşmiş Xəstəxanası, Mingəçevir Şəhər Mərkəzi Xəstəxanası, Yevlax, Xaçmaz, Quba, Göyçay, Bərdə, Zaqatala, Beyləqan və Şəki rayon mərkəzi xəstəxanaları.

Ən çox stasionar xidmət göstərmiş tibb müəssisələrinin ilk onluğu: Gəncə Şəhər Birləşmiş Xəstəxanası, Mingəçevir Şəhər Mərkəzi Xəstəxanası, Quba, Xaçmaz, Ağdaş, Şəki və Bərdə rayon mərkəzi xəstəxanaları, Şirvan Şəhər Mərkəzi Xəstəxanası, Lənkəran və Qusar rayon mərkəzi xəstəxanaları.

Ötən ay ərzində 58 rayon və şəhər üzrə tibb müəssisələrinə müraciətlərin çoxu tibbi müayinə (hərbi xidmətə çağırılanların müayinəsi daxil olmaqla), tənəffüs sistemi xəstəlikləri, qan dövranı sistemi xəstəlikləri, endokrin sistemin xəstəlikləri, maddələr mübadiləsi və qidalanma pozulması, sidik-cinsiyyət sisteminin xəstəlikləri, həzm sisteminin xəstəlikləri, sümük və əzələ sisteminin və birləşdirici toxumanın xəstəlikləri, mamalıq və ginekologiya, gözün və gözün əlavə aparatının xəstəlikləri və müəyyən simptomlarla bağlı olub.

2021-ci ilin dekabr ayında 11 tibbi ərazi bölməsi (TƏB) üzrə göstərilmiş tibbi xidmət sayına görə ardıcıllıq aşağıdakı kimidir:

Bərdə-Yevlax TƏB (294 min 608), Gəncə TƏB (199 min 725), Şəki-Zaqatala TƏB (177 min 681), Quba-Xaçmaz TƏB (173 min 76), Ağdam-Ağcabədi TƏB (105 min 820), Şəmkir-Tovuz TƏB (101 min 8), Göyçay-Kürdəmir TƏB (98 min 671), Dağlıq Şirvan TƏB (88 min 8), İmişli-Sabirabad TƏB (67 min 70), Lənkəran TƏB (49 min 893) və Cəlilabad-Salyan TƏB (38 min 322).

İlkin hesablamalara görə, 2021-ci ilin yanvar-noyabr ayları ərzində ölkə üzrə 19 min 156 nəfər müvafiq göndərişə əsasən dövlət tibb müəssisələrində aparılması mümkün olmayan, habelə xüsusi tibbi təchizat və təminat tələb edən əməliyyat və xidmətlərlə bağlı müqaviləli tibb müəssisələrinə yönləndirilib ki, həmin şəxslərin 541 nəfərini uşaqlar təşkil edib. Belə ki, 18 yaşdan yuxarı 7153 nəfərə invaziv radiologiya (angioqrafiya) üzrə xidmətlər göstərilib. Həmçinin ürək və damar cərrahiyyəsi/kardiologiya üzrə 5700, oftalmologiya üzrə 3277, urologiya üzrə 1356, nevrologiya/neyrocərrahiyyə üzrə 726, travmatologiya üzrə 425, LOR üzrə 228, digər sahələr üzrə 175, ümumi cərrahiyə üzrə 81, ginekologiya və doğuş üzrə 35 nəfər əməliyyat olunub. Qeyd edək ki, ürək və damar cərrahiyyəsi üzrə əməliyyat keçirən pasiyentlərdən 249 nəfər 18 yaşdan aşağı şəxslərdir. Nəzərə çatdırırıq ki, vətəndaşlara verilmiş göndərişlər əsasında müqaviləli tibb müəssisələri tərəfindən tibbi xidmətlərin göstərilməsi və onların elektron reyestrdə qeydiyyatı davam edir.

Məlumat üçün bildirək ki, bütün ölkə üzrə dekabr ayı ərzində 640 min 105 nəfərə 1 milyon 82 min 236 müraciət üzrə 2 milyon 465 min 564 tibbi xidmət göstərilib. Müraciətlər üzrə tibbi xidmətlərin 1 milyon 979 min 532-si ambulator, 486 min 32-si isə stasionar şəraitdə göstərilib.

2021-ci ilin yanvar-dekabr ayları ərzində isə 58 şəhər və rayon üzrə 2 milyon 702 min 149 vətəndaşa 6 milyon 992 min 448 müraciət üzrə 15 milyon 927 min 369 tibbi xidmət göstərilib. Qeyd olunan müddətdə bütün ölkə üzrə 4 milyon 53 min 636 şəxs tibb müəssisələrinə müraciət edib və onlara 10 milyon 348 min 289 müraciət üzrə 22 milyon 954 min 649 tibbi xidmət göstərilib. Həmin xidmətlərdən 17 milyon 675 min 080-i (77 faiz) 18 yaşdan yuxarı, 5 milyon 279 min 569-u (23 faiz) isə 18 yaşdan aşağı şəxslərə göstərilib.

2020-ci ilin yanvarın 1-nə olan rəsmi məlumata əsasən, icbari tibbi sığortanın tətbiq edildiyi 58 inzibati ərazi vahidləri üzrə qeydiyyatda olan əhalinin sayı 6 milyon 560 min 500 nəfər təşkil edir.