Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat (DOST) Agentliyi 2021-ci il ərzində 410 min vətəndaşa xidmət göstərib.

AZƏRTAC xəbər verir ki, bu barədə DOST Agentliyində keçirilən mətbuat konfransında məlumat verən Agentliyin İdarə heyətinin sədri Fərid Məmmədovun verdiyi məlumata görə, müraciətlərin 276 min 951-i (67,46 faiz) sosial müdafiə, 60 min 737-si (14,79 faiz) əlillik, 54 min 948-i (13,38 faiz) məşğulluq, 9 min 207-si (2,24 faiz) nazirliyin fəaliyyət istiqamətlərinə dair arayışların verilməsi, 5 min 783-ü (1,41 faiz) vahid əlaqələndirmə mərkəzləri, 2 min 949-u (0,72 faiz) isə əmək münasibətləri sahəsinə aid olub.

F. Məmmədov deyib: “Müraciətlərin 113 min 179-u 1 saylı Bakı DOST Mərkəzinə, 49 min 309-u 2 saylı Bakı DOST Mərkəzinə, 146 min 567-si 3 saylı Bakı DOST Mərkəzinə, 66 min 487-si 4 saylı Bakı DOST Mərkəzinə, 12 min 792-si Abşeron DOST Mərkəzinə, 22 min 241-i isə 1 saylı Bakı DOST Mərkəzinin nazirlik şöbəsinə edilib. 2022-ci il ərzində Çağrı Mərkəzi 142-yə 400 minə qədər zəng daxil olub. 2019-2022-ci illəri əhatə edən tam dövr ərzində Çağrı Mərkəzi 142-yə ümumilikdə 2 milyon 250 min zəng daxil olub”.

Mətbuat konfransında övladlığagötürmə və funksional yardımçı xidmətlər üzrə 57 minə yaxın müraciət qəbul edildiyi bildirilib. Ötən il ərzində DOST mərkəzlərində 201 min 428 vətəndaş monitorinqə cəlb olunub. Onların 98,2 faizi xidmətdən razı qaldığını bildirilib. Çağrı Mərkəzi 142-də məmnunluq səviyyəsi isə 89,3 faiz olub. Mərkəzlərə müraciət etmiş şəxslərin 54,21 faizini kişi, 45,79 faizini qadınlar təşkil edib.

Qeyd edilib ki, 2021-ci ildə paytaxt ərazisində 2 DOST mərkəzi istifadəyə verilib. Prezident İlham Əliyevin iştirakı ilə mart ayının 30-da 4 saylı Bakı DOST Mərkəzinin, iyulun 14-də isə Abşeron DOST Mərkəzinin açılışı olub.

Agentliyin İdarə heyətinin sədri Fərid Məmmədov deyib: “Avqustun 23-də DOST mərkəzlərində şəhid ailələri üzvləri, müharibə ilə əlaqədar xəsarət almış hərbi qulluqçular və əlilliyi müəyyən edilmiş şəxslərə 7 qurum tərəfindən ümumilikdə 26 xidmət göstərən Vahid Əlaqələndirmə Mərkəzləri (VƏM) fəaliyyətə başlayıb. 2021-ci ilin dekabrından isə VƏM-lər Masallı, Ucar və Gəncə şəhərlərində fəaliyyətə başlayıb. Ötən il avqustun 23-dən bu il martın 17-dək həmin mərkəzlər tərəfindən 18 minə qədər bilavasitə DOST mərkəzləri, 6 mini regional VƏM və 73 mini Çağrı Mərkəzi 142 vasitəsilə olmaqla ümumilikdə 97 minə qədər müraciət qeydə alınıb”.

Məlumat verilib ki, Dayanıqlı və Operativ Sosial Təminat Agentliyinin Müşahidə Şurasının 2021-ci il oktyabrın 5-də verdiyi Qərarı ilə "DOST İnklüziv İnkişaf və Yaradıcılıq Mərkəzi” Məhdud Məsuliyyətli Cəmiyyəti yaradılıb. DOST Agentliyinin Müşahidə Şurasının 2021-ci il dekabrın 17-də 4 nömrəli qərarı ilə DOST Agentliyinin daha bir törəmə təşkilatı - “DOST Rəqəmsal İnnovasiyalar Mərkəzi” MMC təsis edilib. Mərkəz 2021-ci il yanvarın 7-də rəsmi qeydiyyatdan keçərək fəaliyyətə başlayıb.

Mərkəzin yaradılmasında məqsəd şəhid ailəsi üzvlərinin, müharibə ilə əlaqədar əlilliyi müəyyən edilmiş şəxslər və onların uşaqları, valideynlərini itirmiş və valideyn himayəsindən məhrum olmuş uşaqlar, aztəminatlı ailələrin və əlilliyi olan şəxslər sırasından istedadlı şəxslərin mərkəzdə müvafiq istiqamətdə bacarıq və yaradıcılıq potensialının inkişaf etdirilməsidir.

Fəaliyyətə başladığı vaxtdan indiyə qədər 200 nəfər təlimlər üçün mərkəzə müraciət edib və onlardan 144 nəfəri müxtəlif istiqamətlər üzrə təlimlərə başlayıb.