Cəzaçəkmə müəssisələrində vərəmdən ölüm faizi 1995-ci illə müqayisədə 141 dəfə azalıb.

AZƏRTAC xəbər verir ki, Ədliyyə Nazirliyi Tibb Baş İdarəsinin rəisi Rəfail Mehdiyev bu sözləri Ümumdünya Vərəmlə Mübarizə Gününə həsr olunmuş beynəlxalq konfransda bildirib.

İdarə rəisinin verdiyi məlumata görə, ölüm hallarında 2000-ci illə müqayisədə 28 dəfə, 2005-ci illə müqayisədə 13 dəfə, 2010-cu illə müqayisədə 4 dəfə, 2015-ci illə müqayisədə 1,5 dəfə azalma qeydə alınıb, dərmanlara həssas vərəmli xəstələrin birinci sıra dərmanlarla uğurlu müalicə faizi isə 96 faiz təşkil edir: "Ümumdünya Səhiyyə Təşkilatı (ÜST) tərəfindən tövsiyə olunan hədəf göstəricisindən 85 faiz olduğu halda ölkəmizdə həmin göstərici daha yüksəkdir. Çoxsaylı dərmana davamlı formalı vərəmli xəstələrin ikinci sıra və yeni dərmanlarla uğurlu müalicə faizi isə 88 faiz təşkil edir. Halbuki ÜST tərəfindən tövsiyə olunan hədəf göstərici 75 faizdir".

Onun dediyinə görə, vərəm hallarının sayı, o cümlədən açıq formalı və çoxsaylı dərmana davamlı formalı vərəm hallarının sayı kəskin azalıb: "Keçən il bütün vərəm hallarının sayı 2011-ci illə müqayisədə 3,7 dəfə, çoxsaylı dərmana davamlı vərəm hallarının sayı isə 3,3 dəfə az olub. 100 min nəfər populyasiya üçün hesablanan vərəm üzrə xəstələnmə göstəricisi ötən il 2011-ci illə müqayisədə 4,6 dəfə azalıb".