Həssas əhali qruplarına göstərilən sosial xidmət səyyar formada da həyata keçirilir. Ötən il ərzində “Evdə (səyyar) sosial xidmətin göstərilməsi Qaydası”na əsasən 9019 nəfər vətəndaşa səyyar sosial xidmət göstərilib.

AZƏRTAC xəbər verir ki, bunu Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinin İdarə Heyətinin sədri Vüqar Behbudov deyib.

V.Behbudov bildirib ki, onlardan 8834 vətəndaşa evdə sosial-məişət xidməti, 118 sağlamlıq imkanları məhdud uşağa səyyar sosial reabilitasiya xidməti, 67 vətəndaşa isə sosial-hüquqi xidmət göstərilib.

“2021-ci il ərzində evdə sosial-məişət xidməti göstərilən 8834 nəfər vətəndaşdan 7333 nəfəri ahıl, 1501 nəfəri isə 70 yaşdan aşağı olan, tənha yaşayan şəxslər olub. Eləcə də sosial-məişət xidməti göstərilən vətəndaşların 1656 nəfəri əlilliyi olan şəxslər idi. Həmçinin 8834 nəfər vətəndaşın 180 nəfəri 65 yaşdan yuxarı olan, tənha yaşayan və ya COVID-19 pandemiyası ilə əlaqədar olaraq qohumları və ya qanuni nümayəndələri ilə birlikdə yaşamayan şəxslərdir ki, onlara müvəqqəti sosial xidmət göstərilib.

Səyyar sosial xidmət göstərilməsi üçün ötən il ərzində 1737 nəfər vətəndaş müraciət edib ki, onlardan 1317 nəfəri ahıl şəxslər idi. Həmin vətəndaşlardan 223 nəfəri əlilliyi olan şəxslər olub. Müraciət edən şəxslərdən 1502 nəfərə səyyar sosial xidmət göstərilib”.