×
Sentyabrın 8-də “Courtyard by Marriott Baku” otelində “Cultural Network House” media nümayəndələri üçün təqdimat mərasimi təşkil edib.
AZƏRTAC xəbər verir ki, təqdimat mərasimində assosiasiyanın sədri Aynur Süleymanzadə rəhbərlik etdiyi qurumun fəaliyyəti və gələcək planları barədə məlumat verib.
Bildirib ki, assosiasiyanın yaranmasında məqsəd Azərbaycanın milli-mənəvi irsini, ənənələrini və zəngin mədəniyyətini dünya xalqlarına çatdırmaq, eyni zamanda, ölkənin mədəni həyatında fəal iştirak edərək təqdimatlar, vebinarlar, masterklaslar və s. təşkil etməkdir.
Assosiasiya qısa zamanda yaranmasına baxmayaraq, “Ustad dərsləri”, “Biz sənətkarıq”, “Art terapiya” kimi bir neçə mədəniyyət tədbirləri həyata keçirib. Eyni zamanda “Sənətlə toxunuş” adlı layihəsi qrant qazanıb. Layihənin məqsədi, sosial–psixoloji vəziyyəti gərgin olan və sığınacaqlarda yaşayan ana və uşaqlarda art terapiya metodu vasitəsilə emosional vəziyyətin yaxşılaşdırılması və stresin azaldılmasına, özgüvənin artırılmasına dəstək olmaqdır.
Diqqətə çatdırılıb ki, qurum beynəlxalq müstəvidə də Azərbaycan mədəniyyətinin təbliğini həyata keçirir: “Mədəniyyət hər bir insanın həyatına toxunan anlayış və gücdür. Bu gün biz məhz sizin köməyinizlə daha çox qəlblərə və həyatlara toxuna bilərik”.
Aynur Süleymanzadə diqqətə çatdırıb ki, qurumun növbəti il üçün zəngin tədbirlər planında bir sıra mədəniyyət layihələri, xarici səfərlər və ölkədaxili festivallar yer alacaq.
Daha sonra çıxış edən Əməkdar artist, sənətşünaslıq üzrə fəlsəfə doktoru Toğrul Əsədullayev assosiasiyanın fəaliyyətini yüksək qiymətləndirib.
O həmçinin qeyd edib ki, sentyabrın 10-11-də Bakıda Uşaq musiqi və incəsənət məktəblərinin Xalq çalğı alətləri şöbəsində möhtəşəm “Kids Festival”ı keçiriləcək: “Biz bunu səbirsizliklə gözləyirik. Festivalda, eyni zamanda, Bakı Şəhər Mədəniyyət Baş İdarəsinin tabeliyində fəaliyyət göstərən F.Əmirov adına 6 nömrəli onbirillik incəsənət məktəbinin “Nağara” ansamblı, H.Sarabski adına 7 nömrəli uşaq musiqi məktəbinin “Saz” Ansamblı, Şüvəlan qəsəbə Mədəniyyət Evinin və Xətai rayon Mədəniyyət Mərkəzinin nəzdindəki “Səma” rəqs ansamblı iştirak edəcəklər.
Bundan əlavə, animasiya şousu, teatr tamaşaları, nağıl saatı, uşaqlar və böyüklər üçün ustad dərsləri də festival proqramına daxildir”.
Daha sonra “Cultural Network House” Assosiasiyası və Bakı Şəhər Mədəniyyət Baş İdarəsinin birgə təşkilatçılığı ilə Əməkdar artist, Toğrul Əsədullayevin rəhbərliyi ilə həyata keçirilən “Ustad dərsləri” layihəsində iştirak edən istedadlı uşaqlardan ibarət Xalq Çalğı Alətləri Ansamblı çıxış edib.