Xalqımızı möhtəşəm Qələbəyə aparan 44 günün şərəfinə 8 Noyabr - Zəfər Günündə ölkə üzrə 44 min ağac əkilməsi aksiyası çərçivəsində Ekologiya və Təbii Sərvətlər Nazirliyinin təşkilatçılığı ilə Bakı şəhəri Xocasən gölü ətrafında ağacəkmə aksiyası keçirilib.

Aksiyada nazirliyin rəsmiləri, Binəqədi Rayon İcra Hakimiyyətinin əməkdaşları, Azərbaycan Könüllü Təşkilatları İttifaqına üzv könüllülər iştirak ediblər.

AZƏRTAC xəbər verir ki, aksiyada iştirak edən ekologiya və təbii sərvətlər naziri Muxtar Babayev bu günün xalqımız üçün çox xoşbəxt və şərəfli gün olduğunu deyib. O, Zəfər Gününün ölkəmizdə müxtəlif tədbirlərlə, o cümlədən ağacəkmə aksiyaları ilə qeyd edildiyini diqqətə çatdırıb: “Noyabrın 8-də Müzəffər Ali Baş Komandan Prezident İlham Əliyevin rəhbərliyi ilə Azərbaycan Ordusunun əldə etdiyi Zəfərin ildönümü münasibətilə ölkəmizin dörd bir yanında ağacəkmə aksiyası keçirilir. Biz də həmin coşqu və təntənəyə qoşularaq Xocasən gölünün ətrafında 2 hektar ərazidə 2 min Eldar şamı və zeytun ağacları əkdik”.

Nazir işğaldan azad edilmiş ərazilərin dirçəldilməsi tədbirlərinə toxunaraq deyib: “Düşmənin viran və talan etdiyi Qarabağa yeni nəfəs verilir. İnfrastruktur layihələri həyata keçirilir, yaşayış binaları, xəstəxanalar, məktəblər tikilir, meşələr salınır. Ekologiya və Təbii Sərvətlər Nazirliyi olaraq azad edilmiş ərazilərimizin bərpasına töhfə vermək məqsədilə müxtəlif tədbirlər həyata keçiririk. İnanıram ki, yaxın illərdə biz həmin torpaqlarda böyük bir dəyişikliyə şahid olacağıq. Qələbələrimizin davamlı olması diləyi ilə Zəfərimiz mübarək!”.

Ekologiya və Təbii Sərvətlər Nazirliyinin ekokönüllüsü Leyla Məmmədova Zəfər Günü münasibətilə keçirilən aksiyada iştirak etdiyi üçün sevincli olduğunu dilə gətirib: “Bu gün keçirilən aksiyada dörd ağac əkdim. Zəfər Gününü belə əbədiləşdirməkdən qürurluyam. Bir ekokönüllü kimi azad edilmiş ərazilərdə də keçirilən ağacəkmə, meşəbərpa tədbirlərində iştirak etmək və torpaqlarımızın əvvəlki kimi cənnətə dönməsində pay sahibi olmaq istəyirəm”.

Aksiyada 15 ağac əkən Aqrar İnkişaf könüllüsü Nəzrin Hüseynzadə deyib: “Biz çox xoşbəxt gənclərik ki, belə möhtəşəm Zəfərin şahidləri olduq. Azərbaycan gəncliyi dünyaya nəyə qadir olduğunu sübut etdi. Zəfərimizin ildönümü sevincimi ağac əkərək qeyd etdim. Mənim də yaxın qohumlarım arasında Vətən müharibəsi qaziləri var. Onların timsalında bütün qazilərimizə cansağlığı arzu edirəm. Şəhidlərimizə isə Allahdan rəhmət, ailələrinə səbir diləyirəm”.

Ekoloji aksiyanın iştirakçılarından olan ASAN könüllüsü Zeynəb Babayeva əkdiyi beş ağacı şəhidlərimizin əziz xatirəsinə həsr etdiyini bildirib: “Onların hər birini şəhidlərimizin xatirəsinə həsr edirəm. Şəhidlərimiz qanları ilə düşmən tapdağı altında nəfəsi kəsilən torpaqlara can verdilər. Biz də onların şərəfli missiyalarını davam etdirib ağac əkməklə ölkəmizin dörd bir yanını cənnətə çevirməyi hədəfləyirik. Düşmən işğal dövründə genişmiqyaslı ekoloji terror törədib, meşələri məhv edib. Biz isə keçirdiyimiz ağacəkmə aksiyaları ilə onlardan fərqli olaraq quruculuq işləri gördüyümüzü nümayiş etdiririk. Tezliklə əl-ələ verib Qarabağımızı, Şərqi Zəngəzurumuzu da yaşıllıqlara qərq edəcəyik”.

Qeyd edək ki, ölkə üzrə 44 min ağac əkilməsi aksiyası çərçivəsində əkilən ağaclar nazirliyin tinglik sahələrində yetişdirilib.