Fevralın 21-də Diasporla İş üzrə Dövlət Komitəsində dahi Azərbaycan şairi Nizami Gəncəvinin seçilmiş əsərlərinin rus dilində nəşr olunan “Həqiqət” adlı toplusunun təqdimatı keçirilib.

AZƏRTAC xəbər verir ki, geniş oxucu kütləsi üçün nəzərdə tutulan kitabda Nizami Gəncəvinin “Xəmsə”sinə daxil olan “Sirlər xəzinəsi” poeması və müxtəlif şeirləri, qəzəlləri yer alıb.

Kitabın tərtibçiləri sənətşünaslıq üzrə fəlsəfə doktorları Aytən İbrahimova və Sevda Məmmədova, məsul redaktorları Şəfəq Hacıyeva, Natəvan Fərzəliyeva və Fidan Ağayeva, naşiri Feyzi Ağayevdir.

Təqdimat mərasimində çıxış edən Feyzi Ağayev bildirib ki, harada yaşamalarından asılı olmayaraq, bir azərbaycanlı kimi əsas vəzifə dilimizi, tariximizi, ədəbiyyatımızı təbliğ etmək və tanıtdırmaqdır.

Qırx beş ildən çoxdur Rusiyanın Sankt-Peterburq şəhərində yaşadığını deyən F.Ağayev diqqətə çatdırıb ki, dünyada 50 milyondan artıq azərbaycanlı yaşayır və ölkədən xaricdəki azərbaycanlılar, xüsusilə gənclər çox fəal olmalı, diaspor təşkilatları ilə sıx işləməlidirlər.

Nizami Gəncəvinin seçilmiş əsərlərinin nəşrindən əvvəl Azərbaycanın bir sıra görkəmli yazıçılarının və şairlərinin əsərlərinin də onun tərəfindən çap olunduğunu vurğulayan naşir bildirib ki, Nizami Gəncəvinin seçilmiş əsərlərinin yer aldığı kitab Sankt-Peterburqda kitabxanalara paylanıb. Diqqətə çatdırılıb ki, bu əsərin Rusiyanın digər şəhərlərinin kitabxanalarına da verilməsi nəzərdə tutulur.

Onun sözlərinə görə, ədib və mütəfəkkirlərimizin dünyada tanıdılması üçün onların əsərlərinin xarici dillərdə nəşr olunması çox vacibdir.

Sənətşünaslıq üzrə fəlsəfə doktoru Aytən İbrahimova, Milli Kulinariya Mərkəzinin prezidenti Tahir Əmiraslanov və digərləri Azərbaycan mədəniyyətinin, incəsənətinin dünyaya tanıdılmasının əhəmiyyətindən danışaraq, diaspor təşkilatlarının fəallığının artırılmasının vacibliyini vurğulayıblar.