Ötən illərdə də Xocasən qəsəbəsində xeyli yaşıllaşdırma işləri aparmışıq. Təkcə keçən il ölkə üzrə 2 milyondan çox ağac əkilib. Builki hədəfimiz isə 3 milyon ağac əkilməsidir. Keçən il Xocasən ərazisində 75 hektar sahədə 65 minə yaxın ağac əkilib, bu il isə 65 hektar əraziyə 55 minə yaxın ağac əkilməsi nəzərdə tutulub. Burada əsasən Abşeron iqliminə xarakterik olan zeytun və Eldar şamı əkilir. Xocasən gölünə yaxın ərazidə isə Şərq çinarları əkiləcək, çünki həmin ağaclar həddindən çox su sevən ağaclardır. Suya yaxın ərazidə olduğuna görə onun bitiş faizinin də yüksək olacağını düşünürük. Onu da qeyd edim ki, ötən illərdə Xocasən ərazisində 3 hektar ərazidə Şərq çinarı massivi salınıb.

AZƏRTAC xəbər verir ki, bu sözləri ekologiya və təbii sərvətlər nazirinin müavini Firdovsi Əliyev Xocasən qəsəbəsində Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə “Ümumrespublika Yaşıllaşdırma Marafonu” (“Yaşıl Marafon”) çərçivəsində ölkə üzrə növbəti ağacəkmə aksiyası zamanı bildirib.

Nazir müavini deyib: “Biz bu işi daha çox magistral yolların kənarında aparırıq və bu işin görülməsində başlıca məqsəd Bakının ətrafında yaşıl dəhliz yaratmağa xidmət etməkdir. Bugünkü tədbirə Azərbaycan Televiziyası və Radio Verilişləri Qapalı Səhmdar Cəmiyyətinin əməkdaşları da qoşulublar. Çox yaxşı haldır ki, təşəbbüsə qoşulanların sayı gündən-günə artır. Bütövlükdə ölkəmizin regionlarında da bu iş davam etdirilir. Hava şəraitinin xoş keçməsindən istifadə edib daha çox ağac əkməyə çalışırıq. Nə qədər mümkündürsə, bu işi yaz mövsümündə, qalan hissəsini isə payız mövsümündə aparmağa çalışacağıq”.

O, ölkəmizin işğaldan azad olunmuş ərazilərində aparılan yaşıllaşdırma tədbirləri barədə də məlumat verib: “Həmin ərazilər minalardan təmizləndikcə və yaşıllaşdırma aparılması üçün zonalar müəyyənləşdikcə ağacəkmə işləri aparırıq. Onu da qeyd edim ki, aparılan bu tədbirlərdə digər dövlət qurumları da çox yaxından kömək edirlər. Prezident İlham Əliyevin tapşırığına uyğun olaraq böyük qayıdışın tərkib hissəsindən biri də həmin ərazilərdə ekoloji mühitin sağlamlaşdırılması istiqamətində görülən işlərdir. Sakinlər doğma yurdlarına qayıdanda həmin məsələlərin öz həllini tapdığını görməlidirlər. Türkiyənin Kənd Təsərrüfatı və Meşəçilik Nazirliyinin yaxından dəstəyi sahəsində Cəbrayılda “Dostluq bulağı” deyilən ərazidə 40 hektar sahədə tinglik təsərrüfatının, təlim-tədris mərkəzinin və “Dostluq” meşəsinin salınması nəzərdə tutulub. Artıq bununla əlaqədar müvafiq hazırlıq işlərinə başlanılıb. Bu yaxınlarda həmin rayonda yerli şəraitə uyğun olan mindən artıq ağac əkilib. Zəngilan florasının bəzəyi olan Şərq çinarının əkilməsi işləri də aparılır. Orada 55 hektar ərazidə artıq həmin işlərə başlanılıb. Onu da qeyd etməyə dəyər ki, orada əkilən ağaclar da damcı suvarma üsulu ilə təmin olunur.

Biz bu işi sistemli şəkildə aparmağa çalışırıq. Ağac da körpə kimi çox böyük diqqət və qulluq tələb edir. Ona görə də hər əkilən ağacın qayğısını çəkmək və qədrini bilmək lazımdır. Ağacəkmə aksiyaları kütləviləşdikcə ekologiyaya, ətraf mühitə qayğıkeş münasibət formalaşır. Biz nazirliyin təsərrüfatlarında yetişən tingləri müəyyən tədbirlər vaxtı sakinlərə, ayrı-ayrı vətəndaşlara, təbiətsevərlərə hədiyyə olaraq paylayırıq. Həmin tingləri alıb əkən kəs inanmıram ki, sonra əlinə dəhrə, balta alıb nəinki hansısa ağacı kəssin, o, heç onun bir budağının qırılmasına da razı ola bilməz. Biz bu yolla ətraf mühitə, ekologiyaya məhəbbət hissi formalaşdırmağa çalışırıq və ağac əkməklə insanların təmiz oksigenlə təmin olunması işinə öz töhfəmizi vermiş oluruq. Ən azından mən vətəndaşları yaşıllaşdırma tədbirlərinə qoşulmağa və bu yolla heç olmasa udduğu oksigeni təmin etmək işinə töhfə verməyə çağırıram. Kimsə hansısa xörəyi, hansısa yeməyi xoşlamaya bilər, amma heç kim oksigendən imtina edə bilməz, çünki bir dəqiqə nəfəs almamaq həyatın dayanmağı deməkdir. Ona görə də hər kəs ən azı bir ağac əkməlidir”.