Təhsil tələbə kreditlərinin verilməsi üçün müraciət qəbuluna yeni başlanılıb. Artıq bir neçə yüz tələbə bu prosesi tam olaraq yekunlaşdırıb, bəzilərinə hətta təsdiq verilib.

AZƏRTAC xəbər verir ki, bunu UNEC İqtisadi Forumu çərçivəsində jurnalistlərə müsahibəsində təhsil naziri Emin Əmrullayev bildirib.

Nazir qeyd edib ki, sistem yeni olduğundan hər hansı çatışmazlıqların, qüsurların, nöqsanların olması gözləniləndir. Təbii ki, bunların aradan qaldırılması labüddür.

“Bu kreditlər sosial alətdir. Sosial problemi olanlar sosial kreditdən, sosial problemi olmayanlar isə daha yüksək bal yığıb standart güzəştlərdən yararlana bilərlər. Hesab edirəm ki, müəyyən problemlər aradan qaldırılacaq. Biz cəmiyyətlə birgə çalışaraq vəziyyəti düzgün normal şəkildə təmin edə bilərik. Artıq 18 yaşından aşağı olan tələbələrin kredit alması ilə bağlı narazılıq həllini tapır”, - deyə E.Əmrullayev bildirib.