Culfa Lokomotiv Deposunda payız-qış mövsümündə istismar olunacaq 5 elektrovozun və 5 manevr-magistral teplovozun hərəkət və dartı hissələri yoxlanılıb, onlarda, həmçinin 45 ədəd müxtəliftipli vaqonda cari və depo təmirləri aparılıb.

“Naxçıvan Dəmir Yolları” Məhdud Məsuliyyətli Cəmiyyətindən AZƏRTAC-ın Naxçıvan bürosuna bildirilib ki, cari ilin payız-qış mövsümündə vaqon və lokomotivlərin normal və fasiləsiz istismarının təmin olunması məqsədilə qabaqlayıcı tədbirlər görülüb. İstilik sistemləri ilə təchiz edilmiş sərnişin vaqonlarının və aralıq stansiyalarda növbətçi otaqlarının qızdırılması üçün 18,4 ton daş kömür ehtiyatı yaradılıb, mövsüm ərəfəsində isə əlavə olaraq 60 ton kömürün alınıb gətirilməsi təmin ediləcək.

Naxçıvan stansiyası ərazisində sərnişin vaqonlarının yuyulması üçün məntəqənin tikintisi başa çatdırılaraq uzunluğu 50 poqonometr olan dəmir yolu çəkilib.

Xidməti ərazidəki baş və stansiya yollarına baxış keçirilib, yağış və leysan sularının maneəsiz ötürülməsi üçün bütün dağüstü kanallarda, körpü yataqlarında və beton borularda təmir işləri aparılaraq tullantılar təmizlənib. Defektoskop briqadası tərəfindən baş yollar, qəbul-göndərmə yolları və yoldaşıyan qurğular yoxlanılaraq nasazlıqlar bərpa edilib. Ordubad-Şərur sahəsində 625 ədəd yararsız şpal təzə ağac şpalla, 940 yararsız ağac şpal yarımyararlı ağac şpalla, 22 yararsız ağac şpal isə yarımyararlı dəmir-beton şpallarla əvəzlənib. Uçurum gözlənilən yerlərdə təhlükəli daşların zərərsizləşdirilməsi təmin edilərək bütün qüsurlu rels bərkidiciləri dəyişdirilib, yolun plan və profil üzrə təlimata uyğun saxlanılması məqsədilə təkan və çarpaz yatmalar aradan qaldırılıb. Əlavə olaraq “Naxçıvan Dəmir Yolları” Məhdud Məsuliyyətli Cəmiyyəti ilə Rusiya Federasiyasının “Şpalzavod” Məhdud Məsuliyyətli Cəmiyyəti arasında 9600 ədəd təzə ağac şpalın alınmasına dair müqavilə bağlanılıb. Yaxın vaxtlarda ağac şpalların respublikamıza gətirilməsi təmin ediləcək.

Həmçinin istismarda olan güc, dartı və alçaldıcı transformatorlarda profilaktik təmir işlərinə başlanılıb.