Azərbaycan Musiqi Mədəniyyəti Dövlət Muzeyində 18 May - Beynəlxalq Muzeylər Gününə həsr olunmuş "Muzeydən təhsilə" adlı tədbir keçirilib.

AZƏRTAC xəbər verir ki, Azərbaycan Musiqi Mədəniyyəti Dövlət Muzeyinin direktoru, Əməkdar mədəniyyət işçisi Alla Bayramova muzeydə və onun filiallarında aparılan elmi-tədqiqat işləri, elmi araşdırmalar, əldə olunan nəticələr, muzeyin nəşrləri, ali və ümumtəhsil müəssisələri ilə aparılan əməkdaşlığın əhəmiyyətindən bəhs edib.

O bildirib ki, bu il Beynəlxalq Muzeylər Günü “Muzeylər, təhsil və tədqiqat” mövzusuna həsr edilib. Bu mövzu hərtərəfli təhsil təcrübəsinin təmin edilməsində mədəniyyət müəssisələrinin mühüm rolunu vurğulayır və daha şüurlu, dayanıqlı və inklüziv bir dünyanın yaradılmasına təkan verir.

Tədbirin bədii hissəsində muzeyin Qədim Musiqi Alətləri Ansamblının bədii rəhbəri, Xalq artisti Munis Şərifovun və Əməkdar artist Nuriyə Hüseynovanın ifasında rəngarəng musiqi nömrələri təqdim olunub.