Türkiyədə meşə yanğınlarının söndürülməsi və daha geniş miqyas almasına imkan verilməməsi məqsədilə Muğla böhran mərkəzində müşavirə keçirilib.

AZƏRTAC-ın yanğın böhran bölgəsinə ezam olunmuş müxbiri xəbər verir ki, tədbirdə Türkiyənin daxili işlər naziri Süleyman Soylu, nəqliyyat və texnologiya naziri Adil Karaismailoğlu, ətraf mühit və şəhərsalma naziri Murat Kurum və kənd təsərrüfatı və meşəçilik naziri Bekir Pakdemirli və Azərbaycan Respublikasının fövqəladə hallar nazirinin müavini Etibar Mirzəyev iştirak edib. Müşavirədən sonra mətbuat nümayəndələrinə müsahibə verən kənd təsərrüfatı və meşəçilik naziri Bekir Pakdemirli bildirib: “Meşə yanğınları ilə mübarizəmiz davam edir. Bizə yardım edən bütün dostlarımıza minnətdarıq. Ən böyük yardımı qardaşımız Azərbaycandan aldıq. Yanğınla mübarizədə verilən dəstəyə görə bütün azərbaycanlı qardaşlarımıza çox-çox təşəkkür edirik”.

Ümummilli lider Heydər Əliyevin “Bir millət, iki dövlət!” ifadəsini xatırladan nazir Bekir Pakdemirli Azərbaycanın yanğınla mübarizəyə verdiyi dəstəyi, canlı qüvvə və texnikanı sadalayaraq vurğulayıb ki, göstərilən kömək əsl qardaşlıq nümunəsidir.

Daha sonra müsahibə verən nəqliyyat və texnologiya naziri Adil Karaismailoğlu deyib: “Bildiyiniz kimi günlərdir ölkə tariximizdə ən böyük yanğınlardan biri ilə qarşı-qarşıya qalmışıq. Bu çətin günlərimizdə qardaş Azərbaycanı yanımızda görmək bizə çox böyük motivasiya verdi”.

Ətraf mühit və şəhərsalma naziri Murat Kurum iki qardaş ölkənin daim bir-birinin yanında olduğunu bildirib. O qeyd edib ki, Azərbaycan və Türkiyə qardaşlığı sonsuza qədər davam edəcək.

Həmçinin çıxış edən Muğla valisi Orhan Tavlı Azərbaycanın bu çətin günlərdə qardaş Türkiyənin yanında olduğu üçün çox minnət duyduğunu bildirib. Türkiyə və Azərbaycan yanğınsöndürənlərinin çiyin-çiyinə mübarizə aparmasından danışan vali qeyd edib ki, bu qardaşlıq bütün dünya ölkələrinə nümunədir.

Muğlanın millət vəkilləri Mehmet Tavuz Dəmir və Yelda Erol Gökhan azərbaycanlı qardaşların bu çətin günlərdə Türkiyənin yanında olduqlarıni deyiblər.

Daha sonra çıxış edən Azərbaycan Respublikasının fövqəladə hallar nazirinin müavini Etibar Mirzəyev qeyd edib: “Muğlada böhran mərkəzində keçirilən 3 saata yaxın müzakirə başa çatıb. Bu gün Köycəğiz və Bodrum ətrafında yanğınlar baş verib. Digər yanğınlar nəzarət altındadır. Artıq demək olar ki Köycəğizdəki yanğında demək olar ki nəzarət altına alınıb.

General-leytenant avqustun 10-daolan son məlumatda bildirib ki, FHN-in 500 yaxın əməkdaşı Yeniköy, Kəmərköy, Köycəğiz və İlanlı dağında xidmət aparıblar. Bu ərazidə 77 yaxın yanğınsöndürmə avtomobilləri xidməti işlər görüblər. Bizim əməkdaşlarımız Köycəğizdə yanğın ocaqlarının soyudulması işlərini görüblər. Təsadüfən İlan dağı məntəqəsində yanğın başlayıb. Bizim orada 30-dan artıq avtomobilimiz və 150 nəfərə yaxın şəxsi heyətimiz var idi. Onların cəld müdaxiləsi nəticəsində yanğının böyük əraziyə yayılmasının qarşısı alınıb. Əgər yanğının sondürülməsində bir az yubanma olsaydı bunun qarşısını almaq çox çətin olacaqdı”.

E.Mirzəyev yanğının fəsadları barədə vurğulayıb: “Gördüyünüz bu böhran mərkəzində yanğının vurduğu fəsadların aradan qaldırılması ilə bağlı da müzakirələr aparılır. Burada kənd təsərrüfatına dəyən ziyan hesablanır. Muğlada əsasən arıçılıq və maldarlıqla məşğul olurlar. Bu ərazidə həmçinin evlərə dəyən ziyanlar hesablanacaq. Bundan əlavə olaraq şəhərdə və rayonda olan rabitə və kommunikasiya xətlərinə dəyən ziyanlar da hesablanır”

Türkiyə xalqının qardaşlığından danışan nazir müavini deyib: “Hər birimizin gördüyü kimi bu şəhərlərdə və rayonlarda Azərbaycan yanğınsöndürənlərinə gözəl münasibət olub. Bu bizim üçün həmçinin bir təcrübə oldu. Biz daim Türkiyənin yanındayıq. Yaşasın Türkiyə Azərbaycan qardaşlığı!”

Tədbirdə Türkiyədə baş verən yanğınlarla bağlı məsələlər müzakirə olunub.

Qeyd edək ki, nazir Bekir Pakdemirlinin məlumatına görə artıq Muğlanın Milas rayonundakı yanğın nöqtələri nəzarət altına götürülüb.

Xatırladaq ki, baş verən meşə yanğınlarının söndürülməsi üçün hazırda Türkiyədə FHN-in 743 əməkdaşı fəaliyyət göstərir. Bundan başqa, 97 texnika, o cümlədən 77 yanğınsöndürmə, 6 nasos avtomobili, 1 yanacaqdoldurma çəni, 4 qərargah avtomaşını, 2 avtobus və 1 pikap, eləcə də köməkçi texniki vasitələr, “BE-200ÇS” tipli amfibiya təyyarəsi və 1 helikopter Türkiyədə meşə yanğınlarının söndürülməsinə cəlb olunub.