İyulun 22-də Azərbaycan Respublikasının Əqli Mülkiyyət Agentliyinin tabeliyində olan Əqli Mülkiyyət Hüquqlarının Təminatı Mərkəzinin təşkilatçılığı ilə “Müasir mərhələdə müəlliflərin və əlaqəli hüquq sahiblərinin hüquqlarının qorunması üzrə Kollektiv İdarəetmə Təşkilatlarının fəaliyyətləri” mövzusunda beynəlxalq konfrans keçirilir.

AZƏRTAC xəbər verir ki, tədbiri açan Əqli Mülkiyyət Agentliyinin İdarə Heyətinin üzvü Sənan Tapdıqov beynəlxalq konfransın əhəmiyyətindən danışıb.

S.Tapdıqov Vətən müharibəsi nəticəsində işğaldan azad edilmiş ərazilərdə irimiqyaslı layihələrin keçirildiyini vurğulayıb. Qeyd edib ki, əsası ulu öndər Heydər Əliyev tərəfindən qoyulan iqtisadi inkişaf bu gün uğurla davam etdirilir. İslahatlar, həmçinin əqli mülkiyyətin qorunması sahəsində aparılıb. Belə ki, Prezident İlham Əliyevin “İstehlak bazarına nəzarət, standartlaşdırma, metrologiya və əqli mülkiyyət hüquqları obyektlərinin mühafizəsi sahəsində idarəetmənin təkmilləşdirilməsi ilə bağlı tədbirlər haqqında” 2018-ci il 20 aprel tarixli Sərəncamına əsasən Azərbaycan Respublikasının Müəllif Hüquqları Agentliyinin və Patent və Əmtəə Nişanları Mərkəzinin birləşmə formasında yenidən təşkili yolu ilə Azərbaycan Respublikasının Əqli Mülkiyyət Agentliyi yaradılıb.

Bildirilib ki, beynəlxalq tədbirin məqsədi müəlliflik hüququ və əlaqəli hüquqların qorunmasının təşviqi, bu sahədə əmlak hüquqlarının kollektiv əsasda idarə edən təşkilatlar arasında əməkdaşlığın genişləndirilməsi, müəlliflərin (hüquq sahiblərinin) və əlaqəli hüquq sahiblərinin əmlak hüquqlarının kollektiv əsasda idarəçiliyinin, o cümlədən onların qonorar almaq hüquqlarının təmin edilməsi üçün təşkilatlar arasında təcrübə mübadiləsi və qarşılıqlı dəstəyin göstərilməsidir.

Tədbirdə çıxış edən MESAM İdarə Heyətinin sədri Rəcəb Ergül əqli mülkiyyət hüququ və müəllif hüquqlarının qorunmasında Türkiyə təcrübəsindən danışıb və müvafiq sahənin inkişafı ilə bağlı istiqamətlərə diqqət çəkib.

Əqli Mülkiyyət Agentliyinin Aparat rəhbəri Xudayət Həsənli “Agentliyin tabeliyində olan Əqli Mülkiyyət Hüquqlarının Təminatı Mərkəzinin fəaliyyət istiqamətləri və akkreditasiyadan keçmiş kollektiv idarəetmə təşkilatları” mövzusunda məruzə ilə çıxış edib. Məruzəçi Azərbaycanda kollektiv idarəetmə institutunun inkişafına strateji yanaşmanı qeyd edib. O, kollektiv idarəetmə təşkilatlarının gücləndirilməsinə dəstək göstərilməsi, yeni idarəetmə təşkilatlarının yaradılmasının təşviq edilməsi, əmlak hüquqlarının idarəçiliyində şəffaflıq və hesabatlılıq prinsiplərinə ciddi əməl edilməsi məsələlərini, müəlliflərin mənafeyi naminə şəffaflığın təmin edilməsi məqsədilə müvafiq istiqamətləri diqqətə çatdırıb.

Konfransda ölkəmizi təmsil edən müəlliflərin və əlaqəli hüquq sahiblərinin əmlak hüquqlarının kollektiv əsasda idarə edən təşkilatlar - “Azərbaycan Professional Kinorejissorlar Gildiyası” İctimai Birliyi (APKG), “Müəllif Hüquqları Uğrunda” İctimai Birliyi (MHU), “Rəqəmli və Audiovizual Yayım Sənayesi” İctimai Birliyi (RAYS), Türkiyənin “Musiki Eseri Sahipleri Meslek Birliği” (MESAM), “Musiki Eseri Sahipleri Grubu Meslek Birliği” (MSG), Rusiya Federasiyasının “Rusiya Müəllif Cəmiyyəti” (Rossiyskoye Avtorskoye Obşestvo - RAO), Qırğız Respublikasının Nazirlər Kabineti yanında Əqli Mülkiyyət və İnnovasiya Dövlət Agentliyi (KIGIZPATENT), Qazaxıstan Respublikasının “Amanat” Müəlliflik hüququ və əlaqəli hüquqların müdafiəsi üzrə qeyri-kommersiya təşkilatı, Özbəkistan Respublikasının “Müəlliflik hüququ və əlaqəli hüquqların müdafiəsi cəmiyyəti” (UzAvtor) və digər təşkilatların nümayəndələri iştirak ediblər.

Tədbirdə EAKOP-un Baş katibinin müavini Qriqoriy Turinçev, Qazaxıstanın “AMANAT” müəllif və əlaqəli hüquqların qorunması üzrə qeyri-kommersiya təşkilatının baş direktorunun müavini Azamat Tleujanov və başqaları çıxış ediblər. Çıxışlarda beynəlxalq konfransın əhəmiyyəti vurğulanıb, müəlliflik hüququ və əlaqəli hüquqların qorunması istiqamətində Əqli Mülkiyyət Agentliyinin fəaliyyəti yüksək qiymətləndirilib.

Sonra Əqli Mülkiyyət Agentliyi və onun tabeliyində olan Əqli Mülkiyyət Hüquqlarının Təminatı Mərkəzi, o cümlədən Agentliyin yanında İctimai Şuranın fəaliyyəti haqqında məruzələr dinlənilib, ölkəmizdə və qonşu ölkələrdə rəsmi qeydiyyatdan keçmiş kollektiv idarəetmə təşkilatlarının fəaliyyətləri haqqında məlumat veriləcək və mövzu ətrafında fikir mübadiləsi aparılıb.

Qeyd edək ki, Azərbaycan Respublikasının Prezidenti İlham Əliyevin rəhbərliyi ilə ölkəmizdə həyata keçirilən islahatlar çərçivəsində görülən davamlı tədbirlər nəticəsində bütün sahələrdə, o cümlədən əqli mülkiyyət sahəsində əhəmiyyətli dəyişikliklər baş verib. Əqli Mülkiyyət Agentliyi tərəfindən reallaşdırılan düşünülmüş ardıcıl tədbirlərin nəticəsi olaraq əqli mülkiyyət institutunun bütövlükdə təkmilləşdirilməsi və müasir çağırışlara cavab vermə imkanları genişlənib, yaradıcı şəxslərin – müəlliflərin, ixtiraçıların əqli mülkiyyət hüquqlarının qorunmasının daha etibarlı təmin olunma mexanizmləri təkmilləşdirilib.

Son illər müəlliflərin və əlaqəli hüquq sahiblərinin əmlak hüquqlarının idarə edilməsi sahəsində fəaliyyət göstərən kollektiv idarəetmə təşkilatlarının fəaliyyətinin səmərəsinin artırılması üçün hər cür metodiki və hüquqi yardım göstərilir, fəaliyyət sahələri üzrə qarşılaşdıqları problemlərin həllində kömək edilir, bütövlükdə kollektiv idarəetmə sahəsi Agentliyin fəaliyyətində diqqət mərkəzində saxlanır.

Audiovizual əsərlərin və fonoqramların şəxsi məqsədlər üçün gəlir götürmədən surətinin çıxarılmasına görə qonorarın yığılması sahəsində əməkdaşlıq edilməsi məqsədilə Əqli Mülkiyyət Agentliyinin tabeliyində olan Əqli Mülkiyyət Hüquqlarının Təminatı Mərkəzi ilə “Azərbaycan Professional Kinorejissorlar Gildiyası” arasında imzalanmış əməkdaşlıq sazişinə uyğun olaraq, birgə fəaliyyət istiqamətləri müəyyən edilib və həmin təşkilatla bir sıra birgə tədbirlər həyata keçirilib. Belə ki, audiovizual əsərlərin və fonoqramların şəxsi məqsədlər üçün gəlir götürmədən surətinin çıxarılmasında iştirak edilən maddi daşıyıcıların növlərinin müəyyən edilməsi, onları ölkə ərazisinə idxal edən və ölkə ərazisində istehsal edən subyektlərin müəyyən olunması istiqamətində uçotun formalaşdırılması, həmin subyektlərlə qanunvericiliyin tələblərinə dair maarifləndirici tədbirlərin həyata keçirilməsi, audiovizual əsərə münasibətdə müəlliflərin, ifaçıların və audiovizual əsər istehsalçılarının, fonoqrama münasibətdə isə ifaçıların və fonoqram istehsalçılarının qonorar almaq hüququnun təmin edilməsi istiqamətində işlər görülüb.

Son vaxtlar musiqili əsər müəlliflərinin əmlak hüquqlarının kollektiv əsasda idarə edilməsi sahəsindəki mövcud problemlərin aradan qaldırılması məqsədilə 2021-ci ildə musiqili əsər müəlliflərinin hüquqlarını kollektiv əsaslarla idarə edən “Müəllif Hüquqları Uğrunda” İctimai Birliyi Agentlikdə qeydiyyatdan (akkreditasiyadan) keçib. Hazırda həmin təşkilatın fəaliyyətinin səmərəli olması üçün Agentlik tərəfindən hər cür dəstək göstərilir.