1986-cı il aprelin 26-da Çernobıl atom elektrik stansiyasında baş verən qəza bəşəriyyət tarixinin ən böyük texnogen fəlakəti hesab edilir. Qəza zamanı atom stansiyasının dördüncü reaktoru yanaraq tamamilə məhv olmuş, reaktorun fəaliyyəti nəticəsində yığılmış radioaktiv məhsulların bir hissəsi ətraf mühitə yayılmışdı. Radiasiyanın ətraf mühitə yayılması, təxminən, on gün ərzində davam etmiş, daha sonra radioaktiv məhsullar müxtəlif yollarla yayılmağa başlamışdı…

AZƏRTAC xəbər verir ki, aprelin 22-da “Azərbaycan Çernobıl Əlilləri İttifaqı” İctimai Birliyinin üzvləri həmin hadisənin növbəti ildönümü ilə bağlı Fəxri xiyabanda xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini dərin ehtiramla yad edib, məzarı önünə əklil qoyub, tər güllər düzüblər.

AZƏRTAC xəbər verir ki, görkəmli oftalmoloq-alim akademik Zərifə Əliyevanın da xatirəsi ehtiramla anılıb, məzarı üzərinə tər çiçəklər düzülüb.

Tanınmış dövlət xadimi Əziz Əliyevin və görkəmli həkim-alim Tamerlan Əliyevin məzarları üzərinə də gül dəstələri qoyulub.

İctimai Birliyin üzvləri Şəhidlər xiyabanını ziyarət edərək, ölkəmizin azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsini hörmətlə anıb, məzarları üzərinə tər çiçəklər düzüblər.

Ziyarətdən sonra “Azərbaycan Çernobıl Əlilləri İttifaqı” İctimai Birliyinin sədri Mirhəsən Həsənov deyib: “36 il əvvəl baş verən həmin hadisə nəticəsində 7 min nəfər həlak olub, 25 min nəfər ömürlük əlil qalıb. Ukrayna və Belarusda 300 min əhali öz yaşayış yerlərini tərk edib. Ukraynada Çernobıl Atom Elektrik Stansiyasında baş vermiş dəhşətli qəzanın nəticələrinin aradan qaldırılması ilə əlaqədar əlilliyi olan Azərbaycan vətəndaşlarının sayı 5500-dən çoxdur.

Çernobıl Atom Elektrik Stansiyasında qəzanın nəticələrinin ləğv edilməsində iştirak edənlər bəşəriyyətin xilaskarlarıdır. Onların statusunun müəyyənləşməsində, sosial müdafiəsinin gücləndirilməsində xalqımızın ümummilli lideri Heydər Əliyevin böyük xidməti olub və ona görə də bu gün biz Ulu Öndərin məzarını ziyarət edərək ona öz ehtiramımızı ifadə etdik. Yeni növ koronavirus (COVID) pandemiyası ilə əlaqədar olaraq iki il idi ki, ziyarət tədbirlərini təxirə salmışdıq. Bu gün həmin ənənəni yenidən bərpa etdik”.

O, daha sonra deyib: “Sonrakı illərdə də həmin kateqoriyaya mənsub olanların sosial müdafiəsi sahəsində xeyli işlər görülüb. Onların maddi-məişət şəraitinin, sosial vəziyyətinin, maddi rifah halının yaxşılaşdırılması sahəsində başlanılan işlər ardıcıl olaraq davam etdirilir. Hazırda Çernobıl qəzasının nəticələrinin aradan qaldırılmasında iştirak edənlərdən 500 nəfərə yaxıni birinci qrup əlilliyi olan şəxslərə Prezidentin aylıq təqaüdü ödənilir. Ötən il 275, bu ilin birinci rübündə isə 50 Çernobıl əlili yeni mənzillərlə təmin olunub. Yaxın aylarda həmin kateqoriyaya məxsus daha 50 nəfərin mənzillə təmin olunması nəzərdə tutulub.

Çernobıl əlilləri də bu diqqət və qayğıya cavab olaraq ölkənin ictimai həyatında yaxından iştirak edirlər. Onlar Birinci Qarabağ müharibəsi zamanı, övladları isə Vətən müharibəsi zamanı torpaqlarımızın erməni işğalından azad edilməsi uğrunda döyüşlərdə də ön sırada olublar. Şəhid olanlar, təkrar əlillik statusu qazananlar var. Çernobıl AES-də qəzanın nəticələrinin aradan qaldırılmasında iştirak edənlərdən 2 min nəfərdən çoxu Birinci Qarabağ müharibəsində iştirak edib, Vətən müharibəsində isə 100–dən artıq çernobılçının övladı iştirak edib”.