Dövlət Miqrasiya Xidməti yanında əcnəbilərin özlərinin təmsil olunduqları Miqrant Şurası yaradılıb. Bu qurum respublikamızda yaşayan əcnəbilərin Azərbaycan mədəniyyətinə və ictimai həyatına inteqrasiyasına imkan yaradır.

AZƏRTAC xəbər verir ki, bu sözləri Bakıda keçirilən “İnklüziv, mütərəqqi və təkmilləşdirilmiş miqrasiya idarəçiliyi üçün 15 illik tərəfdaşlıq” mövzusunda beynəlxalq tədbirdə Dövlət Miqrasiya Xidmətinin rəisi Vüsal Hüseynov jurnalistlərə müsahibəsində deyib.

V.Hüseynov bildirib ki, eyni zamanda, ölkəmizdə bu sahədə fəaliyyət göstərəcək mərkəzlərin yaradılması planlaşdırılır. Bu istiqamətdə beynəlxalq tərəfdaşlarla birgə iş aparılır.

Ölkəmizə Ukraynadan 9500-dən artıq şəxsin təxliyə olunduğunu xatırladan V.Hüseynov qeyd edib ki, hazırda Azərbaycanda 6800-ə yaxın Ukrayna vətəndaşı yaşayır. Onların 2800-ə yaxınını son 15 gün ərzində Azərbaycana daxil olan şəxslər təşkil edirlər.