“Minalar Əleyhinə Azərbaycan Kampaniyası” İctimai Birliyi Avstriyanın ATƏT yanında Daimi Nümayəndəliyi tərəfindən “İTF İnsan Təhlükəsizliyinin Artırılması” təşkilatının maliyyə dəstəyi ilə “Ötən müharibənin mina qurbanları üçün iqtisadi imkanların yaradılması” adlı layihənin icrasını uğurla yekunlaşdırıb. Layihənin məqsədi Azərbaycanın minalardan daha çox zərər çəkmiş rayonlarında mina qurbanlarının sosial-iqtisadi inteqrasiyasını dəstəkləmək üçün alətlər təqdim etməklə kiçik biznesin yaradılması mexanizminə maddi vəsaiti təmin etməkdən ibarət olub.

AZƏRTAC xəbər verir ki, bu barədə mayın 31-də layihənin yekunlaşması ilə əlaqədar keçirilən mətbuat konfransında təşkilatın sədri, ANAMA yanında İctimai Şuranın katibi Hafiz Səfixanov məlumat verib.

Qeyd edilib ki, bu layihə ailə gəlirinin artırılması, gender bərabərliyi, uşaqların müdafiəsi və sağlamlığı kimi bir neçə əsas istiqaməti əhatə edir. Ailə gəlirinin artması mina qurbanları üçün səhiyyə, təhsil, qidalanma və sair kimi məsələlərdə daha yaxşı imkanlara sahib olmağa səbəb olacaq, özəl sektorun və kiçik biznesin inkişafı və icmalarda iş yerlərinin yaradılmasına gətirib çıxaracaq.

Layihə çərçivəsində keçirilmiş görüşlərdə mina qurbanları və onların ailə üzvləri belə layihələrin keçirilməsini yüksək qiymətləndirib, layihənin icrasına maliyyə yardımı ayırmış donora minnətdarlıqlarını bildiriblər. Onlar kənd təsərrüfatının müxtəlif sahələri üzrə, o cümlədən maldarlıq və qoyunçuluqla məşğul ola biləcəklərini, bu sahələrlə əlaqədar konkret layihələrinin olduğunu deyiblər.

Qrant layihəsi Füzuli, Tərtər və Tovuz rayonlarında həyata keçirilib. Dörd mina qurbanına onların özlərinin istədikləri kiçik bizneslə məşğul olmaq üçün lazımı bütün mal və avadanlıqlar alınıb təhvil verilib. Layihənin benefisiarlarının hamısı müharibədən sonra mina partlayışlarına məruz qalmış mülki şəxslərdir. Layihə çərçivəsində bir neçə monitorinq aparılıb və məlum olub ki, benefisiarlar öz bizneslərinə bağlıdırlar və gələcəkdə böyük nəticələr əldə edə bilərlər.