Belarus Mədəniyyəti Günləri çərçivəsində M.F.Axundzadə adına Azərbaycan Milli Kitabxanasında dəyirmi masa keçirilib.

AZƏRTAC xəbər verir ki, tədbirdə Azərbaycan və Belarus mədəniyyət xadimləri iştirak ediblər.

M.F.Axundzadə adına Azərbaycan Milli Kitabxanasının direktoru Kərim Tahirov Belarus qonaqlarını salamlayaraq, iki ölkə arasında mədəniyyət sahəsində əlaqələrin daha da möhkəmləndirilməsinə ümidvar olduğunu bildirib.

Dəyirmi masanın moderatoru qismində çıxış edən Azərbaycanın mədəniyyət nazirinin müşaviri Cahangir Səlimxanov iki ölkə arasında mədəniyyət sahəsində əlaqələrin yeni formatda qurulmasının zəruriliyini qeyd edib.

Belarus Dövlət Filarmoniyasının baş direktoru Aleksandr Nikita Belarus və Azərbaycan arasındakı oxşar cəhətlərin mövcudluğunu söyləyib. “Biz əməkdaşlığımızın praktiki müstəvisinə çıxmalıyıq. Biz həmkarım, Azərbaycan Filarmoniyasının direktoru Murad Adıgözəlzadə ilə gələcəkdə görüləcək işlərlə bağlı bir neçə layihə hazırlamışıq. Bundan əlavə, Azərbaycanın müxtəlif regionlarında çıxış etmək bizim üçün çox gözəl olardı. Qeyd etmək istəyirəm ki, Azərbaycanda çox sayda güclü səsə malik və istedadlı ifaçılar var. Dünən keçən qala-konsertdə bütün bunların şahidi olduq, tədbirdə Belarusu təmsil edən etnik azərbaycanlılar çıxış ediblər”, - deyə Belarus filarmoniyasının direktoru vurğulayıb.

Azərbaycan Rəssamlar İttifaqının sədri, Xalq rəssamı Fərhad Xəlilov vurğulayıb ki, Mədəniyyət Günləri zamanı çox istedadlı Belarus rəssamlarının yaradıcılığının tam spektrini nümayiş etdirmək mümkün deyil. “Azərbaycanda Belarus Mədəniyyəti Günləri – ikitərəfli qarşılıqlı münasibətlərdə yeni bir mərhələdir. Biz Belarus həmkarları ilə təsviri incəsənət sahəsində əməkdaşlığın genişləndirilməsi ilə bağlı razılığa gəlmişik. Biz 2025-ci ildə həm Belarusda, həm də Azərbaycanda rəssamlarımızın sərgilərini keçirməyi planlaşdırırıq”, - deyə Xalq rəssamı bildirib.

Belarus Milli İncəsənət Muzeyinin direktoru Anna Kononova iki ölkənin mədəniyyət qurumları arasında bir neçə il ərzində aparılan sıx əməkdaşlıqdan bəhs edib. O, bu əlaqələrin gələcəkdə də inkişaf edəcəyinə əmin olduğunu bildirib.

“2025-ci ildə Belarusda Azərbaycan Mədəniyyəti Günləri çərçivəsində biz böyük məmnuniyyətlə Azərbaycan Milli İncəsənət Muzeyinin kolleksiyasını, eləcə də müasir rəssamların əsərlərini nümayiş etdirəcəyik”, - deyə o əlavə edib.

Azərbaycan Milli İncəsənət Muzeyinin direktoru Şirin Məlikova xatırladıb ki, dünən Belarus rəssamlarının sərgisinin açılışı olub, bu, Belarus həmkarları ilə realizə olunan ilk birgə layihədir. Azərbaycan tamaşaçısı üçün təsviri sənətin yeni növlərinin kəşfinin çox maraqlı olacağını qeyd edən muzeyin direktoru əlavə edib ki, iki ölkənin qurumları arasında muzeylərarası əlaqələr qurulur, mütəxəssislər mübadiləsi aparılır.

“Belarusfilm Milli Kinostudiya” Respublika Unitar Müəssisəsinin baş direktoru Aleksey Yuri Azərbaycan kinostudiyalarını Belarusa dəvət edib. “Belarusda Azərbaycan Kino Günlərini keçirməyi təklif edirəm. Azərbaycanlı həmkarlarla görüşlər zamanı biz çərçivə sazişi hazırladıq və ümid edirəm ki, Belarusda Azərbaycan Kino Günlərində imzalanacaq. Biz, həmçinin gələcəkdə Belarusda yaşayan azərbaycanlılar, siz isə Azərbaycanda yaşayan belaruslar haqqında sənədli film də çəkə bilərik”, - deyə baş direktor bildirib.

Dəyirmi masa çərçivəsində iki ölkənin mədəni əməkdaşlığının genişləndirilməsi üzrə müxtəlif təkliflər səsləndirilib.