Sentyabrın 27-də Anım Günü ilə əlaqədar Milli Azərbaycan Tarixi Muzeyində “Şəhidlər ölməz Vətən bölünməz” adlı tədbir keçirilib.

AZƏRTAC xəbər verir ki, tədbir uşaqlarda vətənpərvərlik ruhunun aşılanması, həmrəylik hislərinin gücləndirilməsi, tariximizin yaddaşlarda həkk olunması və yaşadılması məqsədilə Milli Azərbaycan Tarixi Muzeyi və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə baş tutub.

Əvvəlcə Ailə, Qadın və Uşaq Problemləri üzrə Dövlət Komitəsinin əməkdaşları və uşaq kollektivi “Anadır arzulara hər zaman Qarabağ” adlı sərgi ilə tanış olublar.

Tədbirdə qəhrəman şəhidlərimizin əziz xatirəsi birdəqiqəlik sükutla yad edilib.

Muzeyin əməkdaşı Zülfiyyə Cəlilova çıxış edərək bildirib ki, Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq Prezident İlham Əliyevin 2020-ci il 2 dekabr tarixli Sərəncamına əsasən 27 sentyabr ölkəmizdə Anım Günü kimi qeyd edilir. O, 44 günlük Vətən müharibəsi, torpaqlarımızın erməni işğalından azad edilməsi ilə nəticələnən Azərbaycanın böyük Qələbəsi haqqında danışıb.

Elmi işçi Ləman Musayeva tədbirdə iştirak edən uşaqlara ölkəmizin tarixi, Ermənistanın Azərbaycana qarşı ərazi iddiaları və hərbi təcavüzü haqqında məlumat verib.

Sonra tədbirdə şəhid polkovnik-leytenant Anar Əliyevin qızı Nigar Əliyeva və şəhid Azər Əliyevin yaxın qohumu Polad Əliyev çıxış ediblər. Həmçinin Ailə, Qadın və Uşaq Problemləri üzrə Dövlət Komitəsinin Uşaq problemləri şöbəsinin əməkdaşı Günel Nağdəliyeva sərgi ilə bağlı təəssüratlarını bölüşüb.

Sonda Azərbaycan Milli Konservatoriyası tərkibində İncəsənət Gimnaziyasının şagirdləri Sevil Abdullayeva və Ədilə Əliyeva Məhəmməd Hacıyev və Oqtay Şərifovun müşayiəti ilə “Xudayar təsnifi”ni, Fateh İskəndərov isə Gülnarə Teymurzadənin müşayiəti ilə “Qarabağ” mahnısını ifa ediblər.