Bakı Metropoliteni daha bir əhəmiyyətli sosial layihəsini bərpa edib. 1 İyun - Uşaqların Beynəlxalq Müdafiəsi Günü ilə əlaqədar “İçərişəhər” stansiyasının vestibülündə zəngin və əyləncəli proqramlı şou təşkil edilib.

AZƏRTAC xəbər verir ki, bir-birindən maraqlı və fərqli layihələrin eyni məkanda cəm şəklində keçirilməsi stansiyada festival ovqatı yaradıb.

Xüsusi dəvət edilmiş musiqi tərtibatçısının məşhur uşaq mahnılarından ibarət musiqi çələnginin sədaları altında Əməkdar artist, şoumen və naşir Bəhram Bağırzadə səhnəyə gəlib. “Bakı Metropoliteni” QSC-nin təqdimatında o, növbəti kitablarını şəxsən imzalayaraq, azyaşlı oxucularına hədiyyə edib.

Onun şən zarafatları ilə keçən mərasimdə uşaqlar və böyüklər unudulmaz anlar yaşayıb, xatirə şəkilləri çəkdiriblər.

Tədbirdə müxtəlif uşaq tamaşalarının personajları, xüsusi velotəkərlərdə hərəkət edən jonqlyor oyunları uşaqların marağına səbəb olub.

Şou-proqramın budəfəki ənənəvi xüsusi qonağı uşaqların sevimlisi, Dünya İllüziyaçılar Assosiasiyasının üzvü Anar Əliyev nümunəvi çıxışları ilə balacaları təəccübləndirib. Onun yeni proqram əlavə etdiyi səhnə tamaşası heyranlıqla qarşılanıb.

Şən təlxəklərin zarafatcıl oyunları ilə rəngarəng şarlardan düzəldilən fiqurlar, həmçinin metropolitenin hədiyyələri balaca sərnişinlərin iki saat davam edən şoudan tam məmnun ayrılmasını təmin edib.