Artıq üç aya yaxındır ki, ölkəmizdə yeni növ koronavirus (COVID-19) infeksiyası əleyhinə əhalinin vaksinasiyasına başlanılıb. Bu həyati əhəmiyyətli tədbir getdikcə daha sürətlə aparılır və əhali arasında geniş vüsət alır. Ayrı-ayrı müəssisə və təşkilatlar, qurumlar vaksinasiya olunmaq üçün Tibbi Ərazi İdarəetmə Bölmələrini İdarəetmə Birliyinə (TƏBİB) müraciət edirlər. Onlardan bir neçəsi üçün səyyar briqadalar təşkil olunub və vətəndaşlar işdən ayrılmadan çalışdıqları müəssisədə peyvənd olunurlar. Peyvəndlənmənin bu cür təşkili həm onun sürətlə getməsinə, həm də tibb müəssisələrində sıxlığın aradan qaldırılmasına xidmət edir.

AZƏRTAC xəbər verir ki, aprelin 8-də Meliorasiya və Su Təsərrüfatı Açıq tipli Səhmdar Cəmiyyətinin aparat işçiləri öz təşəbbüsləri ilə M.Ə.Əfəndiyev adına 2 nömrəli Şəhər Klinik Xəstəxanasında peyvənd ediliblər.

Melioratorların vaksinasiyası mütəşəkkil qaydada həyata keçirilib və xəstəxanaya gələn melioratorlar kollektivinin üzvləri könüllülük prinsipi əsasında peyvənd ediliblər. İşçilər sosial məsafəni gözləyərək bir-birinin ardınca əvvəlcə, həkim tərəfindən müayinə olunur. Hərtərəfli müayinə olunduqdan sonra hər hansı əks-göstəriş halı olmadıqda qeydiyyata alınaraq peyvənd otağına dəvət olunurlar.

Xəstəxananın həkim-terapevti Ellada Hətəmzadənin dediyinə görə, xəstəxanada peyvənd aparılması üçün gözləmə, qeydiyyat, peyvənd və peyvənddən sonra müşahidə otaqları ayrılıb. Proses mütəşəkkil qaydada və qaydalara uyğun şəkildə aparılır: “Bir ildən artıqdır ki, həyatımızda ciddi narahatlığa səbəb olan COVID-19-a qarşı mübarizənin növbəti mərhələsi məhz peyvənd edilməkdən keçir. Xəstəxanamızın həkim və tibb işçiləri neçə vaxtdır ki, bu sahədə əhali arasında maarifləndirmə işi aparırlar. Peyvəndin necə zəruri bir proses olduğunu indi, demək olar ki, hamı dərk edir. Bunu aparmadan və hər kəsin peyvənd vasitəsilə immunitet qazanmadan sabit həyata dönmək mümkün olmayacaq. Ona görə də bunu dərk edən hər kəs könüllü olaraq bu prosesə qoşulur. Birinci doza orqanizmdə immunitetin yaranmasına, ikinci doza isə onun möhkəmləndirilməsinə səbəb olur”.

Həkim-terapevt qeyd edib ki, yalnız ağır xəstəliyi olanlar, kəskin xroniki xəstəliklərdən əziyyət çəkənlər və son üç gündə hərarəti düşməyənlər peyvənd edilmirlər. Xüsusi risk qrupuna aid olan şəkərli diabet, hemodializli və bronxial xəstələrin isə peyvənd olunmasının faydası var.

Meliorasiya və Su Təsərrüfatı Açıq tipli Səhmdar Cəmiyyətinin Elm, layihə, tikinti və xarici əlaqələr şöbəsinin müdir müavini Teymur Osmanov deyib: “Vaksinasiya müalicə deyil, profilaktik qorunma vasitəsidir. Onun aparılması ya virusa yoluxmamağa, yoluxduqda isə xəstəliyi yüngül keçirməyə xidmət edir. Həyatımızın dəyəri nə qədərdirsə, peyvəndləmənin də dəyəri o qədərdir”.

Digər peyvənd edilən melioratorlar da vaksinasiya prosesinə qoşulan ilk ölkələr sırasında olan Azərbaycanda həyata keçirilən bu tədbiri yüksək qiymətləndiriblər və qeyd ediblər ki, bununla təkcə özlərini deyil, yaxınlarını, doğmalarını, ətrafdakıların da həyatını xilas etmiş olurlar.